2,700 ஆண்டுகளுக்குப் பிறகு தாய்நாடு திரும்பிய பூர்வகுடிகள்

டெல் அவிவ்: 

ஹீப்ரு வேதத்தின் அடிப்படையில் யூத பழங்குடியினத்தின் வழித்தோன்றல்கள் என்று கூறப்படும் 250 க்கும் மேற்பட்ட இந்திய நாட்டைச் சேர்ந்தவர்கள், இஸ்ரேலுக்கு மாற்றும் அரசாங்க நடவடிக்கையின் கீழ், நேற்று டெல் அவிவ் விமான நிலையத்தை  வந்தடைந்தனர்.

விமான நிலையத்தில் பாரம்பரிய யூதப் பாடல்களுடன் அவர்களின் வருகையை  டஜன் கணக்கான மக்கள் வரவேற்றனர்.

இவர்கள் வடகிழக்கு இந்திய மாநிலமான மணிப்பூரில் இருந்து சுமார் 4,600 யூத சமூக உறுப்பினர்களின் குடியேற்றத்திற்கு நிதியளிக்க அரசாங்கம் கடந்த நவம்பரில் முடிவு செய்ததிலிருந்து, இஸ்ரேலுக்கு வரும் 'பினே மெனாஷே' (மெனாஷேயின் மக்கள்) என்று அழைக்கப்படும் முதல் குழுவினர்களாவர்.

அந்தச் சமூகம், ஹீப்ரு வேதத்தில் இஸ்ரேலின் 'தொலைந்து போன பழங்குடியினங்களில்' ஒன்றின் முன்னோர்களான மெனாஷேயின் வழித்தோன்றல்கள் என்று கூறப்படுகிறது. கிமு 720 ஆம் ஆண்டில், அசிரியப் படையெடுப்பாளர்களால் அவர்கள் நாடு கடத்தப்பட்டனர்.

20 ஆண்டுகளுக்கு முன்பு இஸ்ரேலில் குடியேறிய டாகன் ஜோலாட், தனது சகோதரர் என்று தான் விவரிக்கும் ஒரு நபரைச் சந்திப்பதற்காக விமான நிலையத்திற்கு வந்திருந்தார்.

"நாங்கள் அண்டை வீட்டாராக இருந்தோம், மேலும் எங்கள் கிராமத்தில் இருந்த ஒரே யூதர்களில் நாங்களும் அடங்குவோம்" என்று அவர் ஏஎப்பி செய்தி நிறுவனத்திடம் கூறினார். மேலும், தனது நண்பரை ஒன்பது ஆண்டுகளாகச் சந்திக்கவில்லை என்றும் தெரிவித்தார்.

"என் மகன் இன்னும் சிறியவனாக இருந்தபோது (இந்தியாவில்), என் நண்பர் அவனை அடிக்கடி ஏந்திக் கொள்வார்" என்றார் அவர்.

தொலைந்து போன பழங்குடியினங்களின் வம்சாவளியைக் கண்டறியும் முயற்சிகளை மேற்கொள்ளும் ஷவேய் இஸ்ரேல் அமைப்பு, 1990கள் முதல் சுமார் 4,000 பினே மெனாஷே ஏற்கனவே இஸ்ரேலுக்குக் குடிபெயர்ந்துள்ளதாகக் கூறுகிறது. அதே சமயம், சுமார் 7,000 பேர் இன்னும் இந்தியாவில் வசித்து வருகின்றனர்.

அவர்களின் வாய்மொழி வரலாறானது, விருத்தசேதனம் போன்ற சில யூத மத நடைமுறைகளைத் தொடர்ந்து கடைப்பிடித்தபடி, பாரசீகம், ஆப்கானிஸ்தான், திபெத், சீனா வழியாகப் பல நூற்றாண்டுகளாக குடியேற்றத்தைச் சொல்லப்படுகிறது.

இந்தியாவில், 19 ஆம் நூற்றாண்டில் மிஷனரிகளால் நற்செய்தி பரப்பப்பட்டதன் விளைவாக, அவர்கள் கிறிஸ்தவத்திற்கு மதம் மாறினர்.

வியாழக்கிழமை வந்த 250 பினே மெனாஷே, இஸ்ரேலின் வடக்கில் வைக்கப்படுவார்கள் என்று ஒருங்கிணைப்பு அமைச்சு தெரிவித்துள்ளது.
இஸ்ரேலிய குடிமக்களாக மாறுவதற்கு அவர்கள் யூத மதத்திற்கு மாற வேண்டும் என்று குறிப்பிடப்பட்டுள்ளது.

விமான நிலையத்தில் அவர்களின் வருகையை வரவேற்ற குடிவரவு அமைச்சர் ஒஃபிர் சோஃபர், இந்த வருகை ஒரு 'வரலாற்று தருணத்தை' குறிப்பதாக ஏஎப்பி செய்தி நிறுவனத்திடம் கூறினார்.

"இது, முழு சமூகமும் குடிபெயர்வதை சாத்தியமாக்கும் ஒரு நடவடிக்கையின் தொடக்கமாகும்," என்றார் அவர்.

மணிப்பூரில், பெரும்பான்மையான இந்துக்களான மெய்ட்டி இனத்தவருக்கும், பெரும்பான்மையான கிறிஸ்தவர்களான குகி சமூகத்திற்கும் இடையே கிட்டத்தட்ட மூன்று ஆண்டுகளாக அவ்வப்போது மோதல்கள் நிகழ்ந்து வருகின்றன. இதில் 250 க்கும் மேற்பட்டோர் உயிரிழந்துள்ளனர்.

ஏப்ரல் 2025 முதல், 18,000 க்கும் மேற்பட்ட யூதர்கள் இஸ்ரேலுக்குக் குடிபெயர்ந்துள்ளனர். இது முந்தைய ஆண்டை விட 18 சதவீதம் குறைவாகும்.

நீலமும் வெள்ளையும் கலந்த இஸ்ரேல் கொடியின் நிறங்களில் அலங்கரிக்கப்பட்ட வரவேற்பின் மத்தியில், பாரம்பரிய யூதப் பாடல்களுடன் அவர்களை அணைத்துக்கொண்ட அந்த நிமிடம், பிரிவுகளால் நீண்ட காலம் விலகியிருந்த உறவுகளும் நினைவுகளும் மீண்டும் ஒன்றாகும் உணர்ச்சிகரமான தொடக்கமாக மாறியது.

-சங்கீர்த்தனா