ஹோர்முஸ் நீரிணை மூடல் அனைத்து ஆசியான் நாடுகளையும் பாதிக்கிறது: சுல்தான் நஸ்ரின்

கோலாலம்பூர்: 

ஹோர்முஸ் நீரிணை மூடப்பட்டது அனைத்து ஆசியான் நாடுகளையும் பாதித்துள்ளது என்று பேராக் சுல்தான் சுல்தான் நஸ்ரின் ஷா கூறுகிறார்.

நடைபெற்று வரும் மோதல், இப்பிராந்தியத்தில் உள்ள நாடுகளின் பொருளாதாரங்களை நேரடியாகப் பாதிக்கும் என்று அந்தப் பேராக் ஆட்சியாளர் தெரிவித்தார்.

"எரிசக்தி, உரங்கள், போக்குவரத்தின் விலைகள் உயர்வு, உணவு விலைகளை உயர்த்துகிறது, உற்பத்தி, விநியோக செலவுகளை அதிகரிக்கிறது, பணவீக்கத்தைத் தூண்டுகிறது. இதில் குறைந்த எரிசக்தி இருப்புக்களைக் கொண்ட நாடுகளே மிக மோசமாகப் பாதிக்கப்படுகின்றன.

"எனவே, மேற்கு ஆசிய மோதலை முடிவுக்குக் கொண்டுவருவதற்கான பேச்சுவார்த்தைகள் விரைவாகவும், வெற்றிகரமாகவும் முடிவுக்கு வருவது கட்டாயமாகும்" என்று செவ்வாய்க்கிழமை (ஏப்ரல் 21) நடைபெற்ற ஆசியா பாதுகாப்பு சேவைகள், ஆசியா தேசிய பாதுகாப்பு 2026 கண்காட்சிகளின் போது நடைப்பெற்ற புத்ராஜெயா மன்றத்தில் அவர் தனது முக்கிய உரையில் கூறினார்.

அதையடுத்து நிலவிவரும் அழுத்தமான சுற்றுச்சூழல் பிரச்சினையையும் அவர் பிரதிபலித்து அதற்கான உடனடி நடவடிக்கை எடுக்குமாறு வலியுறுத்தினார்.

"சுற்றுச்சூழல் பாதுகாப்பு என்பது ஆடம்பரம் அல்ல. மனித பாதுகாப்பின் ஒவ்வொரு அம்சமும் தங்கியிருக்கும் அடித்தளம் இதுவாகும். எவ்வளவு அதிநவீன இராணுவ தொழில்நுட்பங்களைக் கொண்டிருந்தாலும், தன்னைத்தானே உணவளித்துக் கொள்ள முடியாத, தண்ணீரை வழங்கிக் கொள்ள முடியாத, அல்லது அதன் கடற்கரைகளை வெள்ளத்தில் இருந்து பாதுகாத்துக் கொள்ள முடியாத ஒரு பிராந்தியம், எந்த வகையிலும் பாதுகாப்பாக இருக்க முடியாது.

"எனவே, சுற்றுச்சூழல் உணர்வின் ஒரு சைகையாக அல்ல, மாறாக மூலோபாய யதார்த்தத்தின் ஒரு அங்கீகாரமாக, ஆரோக்கியத்தை ஆசியானின் விரிவான பாதுகாப்பு கட்டமைப்பின் தூணாக இந்த மன்றம் ஏற்றுக்கொள்ளுமாறு நான் வலியுறுத்துவேன்" என்றார் அவர்.

மேலும், இப்பிராந்தியத்தின் பாதுகாப்பு சவால்கள் பல்வேறுபட்டவை என்றும் அவர் வலியுறுத்தினார்.

"இந்தச் சவால்கள் ஒவ்வொன்றையும், தொழில்நுட்பத்தின் சிந்தனைமிக்க, சமமான பயன்பாட்டின் மூலம் குறைக்க முடியும். இருப்பினும், கவனக்குறைவாகவோ அல்லது குறுகிய நலன்களின் சேவையிலோ பயன்படுத்தப்பட்டால், தொழில்நுட்பம் அவை அனைத்தையும் மோசமாக்கும்.

"தொழில்நுட்பம் நிச்சயமாக நமது எதிர்காலத்தை வடிவமைக்கும் இருப்பினும் அமைதி, நிலைத்தன்மை, மனித கண்ணியத்தை நிலைநிறுத்தும் வகையில், நாம் தொழில்நுட்பத்தை வடிவமைக்க வேண்டும். தொழில்நுட்பத்தில் தேர்ச்சி பெற்றவர்களாக மட்டுமல்லாமல், வலுவான தார்மீக பொறுப்புணர்வால் வழிநடத்தப்படும் ஒரு தலைமுறையை நாம் வளர்க்க வேண்டும்.

"ஆசியான் இந்த 'விளிம்பில்' நிற்கும் போது, போட்டி புதுமையை உந்தும் அதே வேளையில், ஒத்துழைப்புதான் அதற்கு அர்த்தத்தைத் தருகிறது என்பதை நாம் அங்கீகரிக்க வேண்டும். உண்மையான பாதுகாப்பு என்பது தனிமையில் அல்ல, ஒன்றிணைந்து செயல்படுவதில் உள்ளது" என்றார் அவர்.

-சங்கீர்த்தனா