உணவுப் பாதுகாப்பிற்குப் புதிய அறைகூவல்: அரிசி விலை உயர்வு எச்சரிக்கை

கோலாலம்பூர்: 

மேற்கு ஆசியாவில் நிலவும் புவிசார் அரசியல் மோதல், ஹோர்முஸ் நீரிணைப் பாதை மூடப்பட்டதைத் தொடர்ந்து, எரிபொருள், உரச் செலவுகள் அதிகரித்து விநியோகச் சங்கிலி சீர்குலைந்ததால் ஆசியாவில் அரிசி விலை உயர்வு ஏற்பட்டுள்ளது. இது நாட்டின் உணவுப் பாதுகாப்பில் புதிய அழுத்த அலையாக மாறியுள்ளதால், இதற்கு அரசாங்கம் தீவிர கவனம் செலுத்த வேண்டும்.

எடுத்துக்காட்டாக, தாய்லாந்தின் வெள்ளை அரிசியின் விலை 10 சதவீதம் உயர்ந்துள்ளது. இது, உள்ளீட்டுச் செலவுகள் அதிகரித்து வருவதற்கும், உற்பத்தியைப் பாதிக்கும் வறண்ட பருவம் போன்ற காலநிலைக் காரணிகள், எதிர்வரும் காலத்தில் விநியோகத்தைக் குறைக்கும் என்பதற்கும் ஒரு ஆரம்ப எச்சரிக்கைச் சமிக்ஞையாக விளங்கியது.

விவசாயிகளுக்கான ஊக்கத்தொகைகளான உழவு ஊக்கத்தொகை (IPKP) உயர்வு, டீசல் உதவி, பூடி விவசாய-பொருட்கள் உதவி அதிகரிப்பதில் அரசாங்கத்தின் செயலூக்கமான நடவடிக்கைகளையும், எதிர்வரும் காலத்தில் நாட்டின் அடிப்படை உணவு விநியோகம் நிலையாக இருப்பதற்கான உத்தரவாதத்தையும் மறுக்க முடியாது என்றாலும், இந்த முயற்சிகள் இன்னும் போதுமானதாக இல்லை. 

முந்தைய அரிசி விநியோக நெருக்கடியின் அனுபவம், அதிகாரிகளுக்கு ஒரு பாடமாக அமைய வேண்டும். அப்போது, பல நடவடிக்கைகள் அறிவிக்கப்பட்டு செயல்படுத்தப்பட்டன. இருப்பினும், உள்ளூர் அரிசி சந்தையில் 'மறைந்து', விலைகள் உயர்ந்து, விநியோகச் சங்கிலியில் உள்ள பல தரப்பினர் ஒருவர்மீது ஒருவர் குற்றம் சாட்டியபோது, மக்களின் கவலையைத் தீர்ப்பதில் அவை தோல்வியடைந்தன. 

தற்போதைய சூழலில், பல ஆரம்ப எச்சரிக்கை அறிகுறிகள் ஏற்கனவே தெளிவாகத் தெரிகின்றன. நாட்டின் உயர் உர இறக்குமதி மீதான சார்பு, கால்நடைத் தீவன விலை உயர்வுக்கான எதிர்பார்ப்புகள், விவசாய உள்ளீடுகளில் பெரும்பகுதியை உள்ளடக்கிய எரிசக்திச் செலவுகள் ஆகியவை, செலவழுத்தத்தை எளிதாகக் கருத முடியாது என்பதைக் காட்டுகின்றன. விரிவாகக் கையாளப்படாவிட்டால், இந்தச் சூழ்நிலை, உற்பத்தி மட்டத்திலிருந்து நுகர்வோர் வரை ஒரு தொடர் விளைவை ஏற்படுத்தும்.

எனவே, அரசாங்கம், அமைச்சுகள், நிறுவனங்கள் முழுவதையும் உள்ளடக்கிய விரிவான அணுகுமுறையுடன் முன்கூட்டியே செயல்பட வேண்டும்.

-சங்கீர்த்தனா