எண்ணெய் விலை விவகாரத்தில் மக்களை குழப்ப முயற்சிப்பதாக பாஸ் தலைவர் மீது குற்றச்சாட்டு: பி.கே.ஆர் சமயப் பணியகம் பணியகம்

கோலாலம்பூர்: 

உலக எண்ணெய் விலை உயர்வுக்கான உண்மையான காரணம் குறித்து, பாஸ் தலைவர் டான் ஸ்ரீ அப்துல் ஹாடி அவாங், மக்களைக் குழப்ப முயற்சிப்பதாகவும், கற்பனையில் வாழ்வதாகவும் பி.கே.ஆர்-இன் சமயப் பணியகம் பணியகம் விமர்சித்துள்ளது.

அதன் தலைவர் அமிடி அப்துல் மனான், மலேசியக் கப்பல்கள் ஹோர்முஸ் நீரிணையில் தடுக்கப்படாததால் மட்டுமே எண்ணெய் விலைகளை உயர்த்துவதற்கு அரசாங்கத்திற்கு எந்த காரணமும் இல்லை என்ற அப்துல் ஹாடியின் கூற்று, தவறான ஒரு தர்க்கமாகும் என்று தெரிவித்தார்.

தற்போது உலகச் சந்தைகளில் எண்ணெய் விலைகள் உயர்வதற்கான முக்கிய காரணிகள், ஈரானின் நடவடிக்கைகளால் கப்பல் பாதைகள் தடைபடுவதும், விநியோகம், தேவை சமநிலையும் ஆகும் என்று அவர் விளக்கினார்.

ஹோர்முஸ் நீரிணை உலக எண்ணெய் விநியோகத்தில் 20 சதவீதத்திற்கு ஒரு பாதையாக இருந்தாலும், மற்ற பாதைகள் வழியாக செல்லும் மீதமுள்ள 80 சதவீதமும் திடீர் விலை உயர்வை சந்திப்பதாக அவர் கூறினார்.

"இது வெளிப்படையாக உற்பத்தி செய்யும் நாடுகளின் மொத்த விநியோகம், அதிகரித்த இயக்கச் செலவுகளுடன் தொடர்புடையது.

"வளைகுடா நாடுகளின் எண்ணெய் உற்பத்தியில் 30 சதவீதம் வரை குறைவு இருப்பதாக ஊடக அறிக்கைகள் காட்டுகின்றன. இது உலக விநியோகத்தில் குறிப்பிடத்தக்க தாக்கத்தை ஏற்படுத்தியுள்ளது. எண்ணெய் விலைகளை உயர்த்தியது உண்மையில் இந்தச் சூழ்நிலையே ஆகும்" என்று அவர் இன்று ஒரு ஊடக அறிக்கையில் கூறினார்.

மாராங் நாடாளுமன்ற உறுப்பினர் எழுப்பிய குழப்பம் வேண்டுமென்றே செய்யப்பட்டதா அல்லது அறியாமலா என்றும் அமிடி கேள்வி எழுப்பினார்.

உலகளாவிய பொருளாதார யதார்த்தத்தைப் புரிந்து கொள்ளத் தவறினால், மக்களிடையே எதிர்மறை உணர்வுகளை மட்டுமே தூண்டும் என்று அவர் கூறினார்.

"அப்துல் ஹாடி, எண்ணெய் விலை உயர்வு அரசாங்கத்தின் நிர்வாகத் தோல்வியின் விளைவு என்ற ஒரு படத்தைக் கொடுக்க முயற்சிக்கிறார்.

"இந்த நடவடிக்கை இறுதியில் வெறுப்பையும் கோபத்தையும் தூண்டும். இது நாட்டின் அரசியல் நிலைத்தன்மையைப் பாதிக்கும். இது பாஸ்-இன் குறுகிய அரசியலுக்கு மட்டுமே பயனளிக்கும்" என்று அவர் கூறினார்.

-சங்கீர்த்தனா