எந்தத் தடை வந்தாலும் காசாவுக்கே முன்னுரிமை: புவிசார் அரசியல் நெருக்கடிகளுக்கு மத்தியிலும் பின்வாங்காத மலேசியக் குழு

கெய்ரோ: 

மேற்கு ஆசியாவின் பிற பகுதிகளில் மோதல், புவிசார் அரசியல் கொந்தளிப்பு, அதிகாரப் பதற்றமும் உச்சத்தை எட்டியிருந்தாலும், காசாவில் உள்ள மனிதாபிமான நெருக்கடிக்கு மலேசியாவின் முன்னுரிமை ஒதுக்கப்படவில்லை, மேலும் அது தொடரப்படும்.

சுமுத் நுசந்தரா கட்டளை மையத்தின் (எஸ்.என்.சி.சி.) தலைமை இயக்குநர் டத்தோ சனி அரபி அலிம் அரபி, மலேசியா எதிர்கொள்ளும் பல்வேறு அறைகூவல்களுக்கு மத்தியில், பெருகிய முறையில் நெருக்கடியில் உள்ள பாலஸ்தீனிய மக்களின் உயிர்வாழ்வை உறுதி செய்வதற்காக, காசாவுக்கான 30 கொள்கலன்கள் மலேசிய மனிதாபிமான உதவிப் பணியைத் தொடர மலேசியா உறுதிபூண்டுள்ளது என்று தெரிவித்துள்ளார்.

உலகப் பொருளாதார நிச்சயமற்ற தன்மை, அமெரிக்க டாலருடன் ஒப்பிடும்போது நாணய நிலையற்ற தன்மை, ஹோர்முஸ் நீரிணையில் ஏற்பட்டுள்ள நெருக்கடி ஆகியவை அந்தப் பணிக்கான உதவிப் பொருட்களை வாங்குவதற்கான செலவுகளை உயர்த்தும் பெரும் சவால்களில் அடங்கும் என்று அவர் ஒப்புக்கொண்டார்.

"காசாவிற்காகச் சேவை செய்யும் இத்தகைய தன்னார்வ தொண்டு நிறுவனங்களுக்கு, செலவு உயர்வு ஏற்படும் போது நாங்கள் நேரடியாகப் பாதிக்கப்படுகிறோம். முதலாவதாக, நாணய மதிப்பு நிலையற்றதாக உள்ளது. ஏனெனில், நாங்கள் அனைத்தையும் மலேசிய ரிங்கிட்டில் அல்ல, மாறாக அமெரிக்க டாலரில் வாங்குகிறோம். எனவே, இது தன்னார்வ தொண்டு நிறுவனங்களுக்கு மிகப்பெரிய தாக்கத்தை ஏற்படுத்துகிறது" என்றார் சனி அரபி.

இங்குள்ள மாப்பிம்-அல் கைர் கிடங்கில் அந்தப் பணியின் இறுதி ஏற்பாடுகளை ஆய்வு செய்த பின்னர், ஊடகங்களிடம் சஆனி அரபி இவ்வாறு கூறினார்.

பிராந்திய மட்டத்தில் பெரிய போர் கட்டம் குறித்த கவலைகள் இப்போது இருந்தாலும், பாலஸ்தீனிய மக்களுக்கு எதிரான சியோனிச ஆட்சியின் முற்றுகையைத் தொடர்ந்து ஊடுருவும் மலேசிய பிரதிநிதிகள் குழுவின் உறுதியை அந்த நிலைமை சிறிதும் முறியடிக்கவில்லை என்று சஆனி அரபி  தெரிவித்தார்.

இந்தப் பணி, காசாவில் 100,000 மக்களின் நலனுக்காக இலக்கு வைக்கப்பட்ட 374 டன் அத்தியாவசியப் பொருட்களைக் கொண்டு செல்கிறது.

30 கொள்கலன்கள் காசாவின் 2.2 மில்லியன் மக்களின் ஒட்டுமொத்த தேவைகளில் ஒரு சிறிய சதவீதத்தை மட்டுமே பிரதிநிதித்துவப்படுத்தினாலும், அந்த முயற்சி, அந்தப் பகுதியில் அடிப்படை மனிதாபிமான உரிமைகள் மறுக்கப்படுவதை மலேசியா அனுமதிக்காது என்பதற்கான ஒரு தெளிவான செய்தியாகும் என்று சனி அரபி கூறினார்.

"உலகம் ஒரு போர்க் கட்டத்தில் நுழையும் நேரத்தில், நாம் பாலஸ்தீனத்தைச் சுதந்திரமாக்க உதவும் என்று நம்பும் விஷயங்களைச் செய்ய முடியும் என்று நமக்குத் தோன்றும் கூறுகளைப் பார்த்து, நாம் நாட்டின் ஒற்றுமையை வலுப்படுத்த வேண்டிய நேரம் இது" என்றார் அவர்.

மலேசிய இஸ்லாமிய நிறுவனங்களின் ஆலோசனைக் குழுவால் (மாப்பிம்) ஏற்பாடு செய்யப்பட்ட காசாவுக்கான 30 கொள்கலன்கள் மலேசிய மனிதாபிமானப் பணி 2026, காசாவில் உள்ள பாலஸ்தீனிய மக்களுக்கு உதவும் வகையில் 374 டன் மனிதாபிமான உதவிப் பொருட்களைக் கொண்ட 30 கொள்கலன்களைக் கொண்டு செல்கிறது.

மலேசிய ஊடகங்களும் அந்தப் பணியில் பங்கேற்கின்றன. மலேசிய தேசிய செய்தி நிறுவனத்தின் செய்தியாளர்கள், புகைப்படக் கலைஞர்கள் இதில் அடங்குவர்.

-சங்கீர்த்தனா