இஸ்லாமிய உலகம் மௌனம் கலைக்க வேண்டும்: ரோகிங்கியா சிறுபான்மையினருக்காகக் குரல் கொடுக்க ஆர்வலர் கோரிக்கை

ஜகார்தா: 

மியான்மர் ஜூந்தா அந்தச் சிறுபான்மையினத்திற்கு எதிராக மனித உரிமை மீறல்களைச் செய்ததாகக் குற்றம்சாட்டப்பட்ட நிலையில், ஒரு ரோஹிங்கியா உரிமை ஆர்வலர் இஸ்லாமிய உலகம் அதை எதிர்க்க வேண்டும் என்று கோரிக்கை விடுத்துள்ளார்.

ரோஹிங்கியாவைச் சேர்ந்த பாதிக்கப்பட்டவர்களுக்கு நீதி கிடைப்பதை உறுதி செய்வதற்கு இந்த நடவடிக்கை முக்கியமானது என்று இந்தோனேசியாவில் இனப்படுகொலை புகாரைத் தாக்கல் செய்யும் பிரச்சாரத்தை வழிநடத்தும் 34 வயதுடைய யாஸ்மின் உல்லா கூறினார்.

திங்கட்கிழமை இந்தோனேசியாவின் தலைமை வழக்கறிஞரிடம் புகாரைச் சமர்ப்பித்த 11 பிரதிவாதிகளில் அவரும் ஒருவர். பெரும்பான்மையாக முஸ்லிம்களைக் கொண்ட ரோஹிங்கியா சமூகத்திற்கு எதிராக மியான்மரின் தேர்ந்தெடுக்கப்பட்ட ஜனாதிபதி மின் ஆங் ஹ்லைங் மனித உரிமை மீறல்களைச் செய்ததாகக் குற்றம்சாட்டப்பட்டுள்ளது.

உலகின் மிகப்பெரிய முஸ்லிம் மக்கள்தொகையைக் கொண்டிருப்பதாலும், பொறுப்புக்கூறும் கொள்கைகளைக் கடைப்பிடிப்பதாலும் இந்தோனேசியா தேர்ந்தெடுக்கப்பட்டது என்று யாஸ்மின் கருத்துரைத்தார்.

"இந்தோனேசிய, ஆசியான் தலைமைக்கு நாம் விரும்பும் எதிர்காலத்தைப் பற்றி சிந்திக்குமாறு நான் அழைப்பு விடுக்கிறேன்.

"நாம் பொருளாதார செழிப்பு, ஆசியான் மக்களின் நல்வாழ்விற்கு முன்னுரிமை அளித்தால், இந்தப் பிராந்தியத்தில் நிலையற்ற தன்மைக்கான முக்கிய காரணமான மியான்மர் இராணுவம் கையாளப்பட வேண்டும்" என்று அவர் ஏ.எப்.பி செய்தி நிறுவனத்திடம் கூறினார்.

இந்தோனேசிய சட்டம், நீதிமன்றங்கள் உலகளாவிய அதிகார வரம்பு கொள்கையின் அடிப்படையில் வழக்குத் தொடர்வதை அனுமதிக்கிறது. இது, வெளிநாட்டில் செய்யப்பட்டிருந்தாலும், கடுமையான குற்றங்களுக்கு எதிராக நடவடிக்கை எடுப்பதைச் சாத்தியமாக்குகிறது.

இதற்கு முன்னர், ரோஹிங்கியா ஆர்வலர்கள் அதே கொள்கையைக் கடைப்பிடிக்கும் அர்ஜென்டினாவில் உள்ள நீதிமன்றங்களிலும் இதே போன்ற வழக்குகளைக் கொண்டு சென்றிருந்தனர்.

மூன்று வயதில் மியான்மரை விட்டு வெளியேறிய பிறகு, தற்போது கனடாவில் வசித்து வரும் உல்லா, ரோஹிங்கியா மையாஃபுயினோர் ஒத்துழைப்பு வலையமைப்பையும் நிறுவியுள்ளார்.

இந்தோனேசியாவில் உள்ளவர்கள் உட்பட, பாதிக்கப்பட்டவர்கள் தங்கள் வழக்கை வாதிட முடியும் என்பதற்காக, மின் ஆங் ஹ்லைங்கை நீதிமன்றத்தில் ஆஜர்படுத்த முடியும் என்று அவர் நம்புகிறார்.

மியான்மர் ஜூந்தா 2021 ஆம் ஆண்டு இராணுவப் புரட்சி மூலம் அதிகாரத்தைக் கைப்பற்றியது. அதன் பின்னர், குறிப்பாக ரோஹிங்கியா போன்ற இனச் சிறுபான்மையினருக்கு எதிராக, பல்வேறு மனித உரிமை மீறல்களைச் செய்ததாக அது குற்றம் சாட்டப்பட்டுள்ளது.

கடந்த வாரம், இராணுவ ஆதரவு நாடாளுமன்ற உறுப்பினர்கள் மின் ஆங் ஹ்லைங்கை அதிபராகத் தேர்ந்தெடுத்தனர். இது, ஒரு சிவில் நிர்வாகத்தின் வடிவில் தொடர்ந்து ஆட்சி செய்வதை அவருக்கு சாத்தியமாக்கியுள்ளது.

இதுவரை, மியான்மர் அதிகாரிகள் இந்தோனேசியாவில் உள்ள வழக்கு குறித்து கருத்து தெரிவிக்கவில்லை. இருப்பினும், ரோஹிங்கியாக்கள் வங்காளதேசத்திலிருந்து வந்த குடியேறிகளின் வழித்தோன்றல்கள் என்றும், 2017 ஆம் ஆண்டு நடவடிக்கை கலகத்திற்கு எதிராக இலக்கு வைக்கப்பட்டது என்றும் முன்னர் வலியுறுத்தியுள்ளனர்.

-சங்கீர்த்தனா