ஆலய சர்ச்சைகளுக்கு தீர்வு காணும் முயற்சியாக தேசிய ஆலயக் கருத்தரங்கு;  பத்துமலையில் நடைபெறும்: டத்தோ சிவக்குமார்

பத்துமலை:

ஆலய சர்ச்சைகளுக்கு தீர்வு காணும் முயற்சியாக தேசிய ஆலயக் கருத்தரங்கு பத்துமலையில் நடைபெறவுள்ளது.

மலேசியாவில் உள்ள வழிபாட்டுத் தலங்களின் மேலாண்மை, சட்ட அம்சங்கள் குறித்த விரிவான புரிதலை வழங்குவதற்காக இந்த கருத்தரங்கு ஏற்பாடு செய்யப்பட்டுள்ளது.

தேசிய நிலச் சட்டம், நகர, கிராம திட்டமிடல் சட்டத்தைப் புரிந்துகொள்ளுதல்: கோயில்களுக்கான நிலம் என்ற தலைப்பில் இந்த கருத்தரங்கு நடைபெறவுள்ளது.

தற்போதைய சட்டத் தேவைகள் குறித்து ஆலயம் நிர்வாகம் அதிக அறிவும் உணர்வும் கொண்டிருக்க அதிகாரம் அளிக்கும் ஒரு முக்கிய முன்னெடுப்பாக இந்தக் கருத்தரங்கு நடத்தப்படுகிறது.

இந்தக் கருத்தரங்கின் மூலம், ஆலய நிர்வாகம் நிலச் சட்ட நடைமுறைகள், குறிப்பாக தேசிய நிலச் சட்டம் தொடர்பான நடைமுறைகள் குறித்து ஆழமான புரிதலைப் பெறும்.

மேலும், வழிபாட்டுத் தலங்களின் அமைவிடம்,  மேம்பாடு ஆகியவை ஒழுங்கான, முறையான வழியில் மற்றும் உள்ளூர் அதிகாரிகளால் நிர்ணயிக்கப்பட்ட வழிகாட்டுதல்களுக்கு இணங்க மேற்கொள்ளப்படுவதை உறுதி செய்வதில் நகர, கிராம திட்டமிடல் சட்டத்தின் பங்கையும் இந்தக் கருத்தரங்கு வலியுறுத்துகிறது.

இந்த கருத்தரங்கு வரும் 11 ஏப்ரல் 2026 (சனிக்கிழமை) அன்று, காலை 9.00 மணி முதல் பிற்பகல் 3.00 மணி வரை பத்துகேவ்ஸ் ஸ்ரீ சுப்பிரமணியர் சுவாமி கோயில் மண்டபத்தில் நடைபெறும். 

இந்தக் கருத்தரங்கை, கோலாலம்பூர் ஸ்ரீ மகா மாரியம்மன் தேவஸ்தானத்தின் தலைவரும், மஹிமாவின் ஆலோசகருமான டான்ஸ்ரீ டத்தோ டாக்டர் ஆர். நடராஜா அவர்கள் அதிகாரப்பூர்வமாக தொடங்கி வைப்பார்.

மஹிமா, கோலாலம்பூர் ஸ்ரீ மகா மாரியம்மன் தேவஸ்தானக் கோயில், கியூமிக் (CUMIG), டிஎஸ்கே அமைப்பு ஆகியவற்றின் ஒத்துழைப்புடன் ஏற்பாடு செய்யப்பட்டுள்ளது.

ஆகவே ஆலய நிர்வாகத்தினர் பொறுப்பாளர்கள் திரளாக வந்து இக் கருத்தரங்கில் கலந்து கொள்ள வேண்டும் என டத்தோ சிவக்குமார் கூறினார்.

- பார்த்திபன் நாகராஜன்