அமெரிக்க வரலாற்றில் முதன்முறையாக ஆளுநர் தேர்தலில் போட்டியிடும் 14 வயது மாணவன்

நியூயார்க்: 

அமெரிக்காவின் வெர்மான்ட் மாநில அரசியல் வரலாற்றில், 14 வயது சிறுவன் ஒருவன் ஆளுநர் பதவிக்குப் போட்டியிடத் தகுதி பெற்று புதிய சாதனை படைத்துள்ளார்.

டீன் ராய் என்ற அந்த மாணவர், வரும் நவம்பர் மாதம் நடைபெறவுள்ள பொதுத்தேர்தலில் ஆளுநர் பதவிக்கான மிக இள வயது வேட்பாளராக அதிகாரப்பூர்வமாகப் களம் இறங்குகிறார்.

ஸ்டோவ் உயர்நிலைப் பள்ளியில் ஒன்பதாம் வகுப்பு பயின்று வரும் ராய், கடந்த ஆண்டு வெர்மான்ட் மாநில சட்டமன்றத்தில் மாணவர் பிரதிநிதியாகப் பணியாற்றியபோது அரசியலில் ஈர்க்கப்பட்டார். 

18 வயதிற்குட்பட்ட ஒருவர், ஒரு மாநிலத்தின் மிக உயர்ந்த நிர்வாகப் பதவிக்குப் போட்டியிடுவது இதுவே முதல் முறையாகும்.

இளைஞர்களிடையே மாற்றத்திற்கான விழிப்புணர்வை ஏற்படுத்துவதே தனது முதன்மை நோக்கம் என அவர் தெரிவித்துள்ளார்.

வெர்மான்ட் மாநில அரசியலமைப்பில் ஆளுநர் பதவிக்குப் போட்டியிடக் குறைந்தபட்ச வயது வரம்பு எதுவும் குறிப்பிடப்படவில்லை என்பதே ராய் போட்டியிட முக்கியக் காரணமாக அமைந்தது.

அம் மாநில சட்டப்படி, போட்டியிடும் வேட்பாளர் அங்கு குறைந்தது நான்கு ஆண்டுகள் வசித்திருக்க வேண்டும் என்ற தகுதியை டீன் ராய் நிறைவு செய்துள்ளார்.

"இந்தத் தேர்தலில் நான் முழுமையான வெற்றியை எதிர்பார்க்கவில்லை; மாறாக, இளைஞர்களிடையே ஒரு புதிய எழுச்சியை உருவாக்கவே விரும்புகிறேன்" என்று ராய் தனது நேர்காணலில் குறிப்பிட்டுள்ளார்.

வயது ஒரு தடையல்ல என்பதை நிரூபித்துள்ள இச்சிறுவனின் முயற்சி, தற்போது உலக அளவில் பலரது கவனத்தையும் ஈர்த்துள்ளது.

-கிரித்திக்கா