கிளாந்தான் ஆற்றில் நீர்மட்டம் சரிவு: சுற்றுச்சூழல் சமநிலை பாதிப்பு குறித்து ஆய்வாளர்கள் எச்சரிக்கை

கோத்தா பாரு: 

கிளாந்தான் மாநிலத்தின் முக்கிய ஆறுகள் தற்போது பச்சை நிறமாக மாறியிருப்பதும், நீர்மட்டம் பெருமளவில் குறைந்திருப்பதும் அப்பகுதி மக்களிடையே பேசுபொருளாகியுள்ளது.

இது ஆறு தூய்மையாவதற்கான அறிகுறி அல்ல, மாறாக நீண்ட கால வறட்சி, சுற்றுச்சூழல் அழுத்தத்தினால் ஏற்பட்ட மாற்றம் என மலேசிய கிளாந்தான் பல்கலைக்கழகத்தின் (UMK) ஆய்வாளர் பேராசிரியர் முஹம்மத் ஃபைஸ் முஹம்மத் அமீன் தெரிவித்துள்ளார்.

பொதுவாக மழைக்காலங்களில் ஆற்றில் மண்ணரிப்பு காரணமாக நீர் பழுப்பு நிறமாக இருக்கும். தற்போது மழை இல்லாததால் ஆற்றில் கலக்கும் வண்டல் மண்ணின் அளவு குறைந்து, நீர் தெளிவடைந்துள்ளது.

இதன் காரணமாக சூரிய ஒளி நீரின் ஆழம் வரை ஊடுருவி, அங்குள்ள பாசிகள் அல்லது இயற்கையான நீர்வாழ் அமைப்பின் நிறத்தைப் பிரதிபலிப்பதாக அவர் விளக்கியுள்ளார். இது நீரின் தரம் உயர்ந்ததைக் குறிக்காது, வெறும் இயற்பியல் மாற்றம் மட்டுமே என அவர் சுட்டிக்காட்டினார்.

தொடர்ந்து நிலவும் வறட்சியால் சுங்கை கோலோக் போன்ற ஆறுகளின் நீர்மட்டம் இயல்பான 5 மீட்டரிலிருந்து 3.26 மீட்டராகக் குறைந்துள்ளது. இவ்வாறு நீர்மட்டம் குறையும்போது, ஆற்றில் உள்ள கழிவுகளின் அடர்த்தி அதிகரிப்பதோடு, நீரின் வெப்பநிலையும் உயரும். இது நீர்வாழ் உயிரினங்களுக்குப் பெரும் அச்சுறுத்தலாக அமைவதுடன், பொதுமக்களின் அன்றாடக் குடிநீர் விநியோகத்தையும் பாதிக்கும் அபாயம் உள்ளது.

இறுதியாக, கிளாந்தானில் நிலவும் இந்தச் சூழல் பருவநிலை மாற்றத்தால் ஏற்படும் தண்ணீர் பற்றாக்குறை நெருக்கடியின் ஆரம்ப அறிகுறியாகும். ஆறு பார்ப்பதற்கு அழகாகத் தெரிந்தாலும், அது தனது இயற்கையான உயிர்வாழும் திறனை இழந்து வருவதாக ஆய்வாளர்கள் எச்சரிக்கின்றனர்.

எனவே, தரவு அடிப்படையிலான புதிய நீர் மேலாண்மை முறைகளை நோக்கி நாம் நகர வேண்டியது அவசியம் என வலியுறுத்தப்பட்டுள்ளது.

-கிரித்திக்கா