“பெர்லிஸ் வெப்ப அலை 37 டிகிரி செல்சியஸைத் தாண்டினால் பள்ளிகளுக்கு விடுமுறை”: மாநிலக் கல்வித் துறை அறிவிப்பு

கங்கார்:

பெர்லிஸ் மாநிலத்தில் நிலவும் கடும் வெப்ப அலை காரணமாக, தினசரி அதிகபட்ச வெப்பநிலை தொடர்ந்து மூன்று நாட்களுக்கு 37 டிகிரி செல்சியஸைத் தாண்டினால், பள்ளிகள் மூடப்பட்டு மாணவர்கள் வீட்டிலிருந்தே கல்வி கற்கும் முறை அமல்படுத்தப்படும் என மாநிலக் கல்வித் துறை அறிவித்துள்ளது. 

தற்போதைக்கு வகுப்புகள் வழக்கம் போல் நடைபெற்றாலும், வெப்ப அலையைச் சமாளிப்பதற்கான சிறப்புத் திட்டத்தின் கீழ் இந்தப் பாதுகாப்பு நடவடிக்கைகள் மேற்கொள்ளப்பட்டுள்ளதாகக் கல்வித் துறை இயக்குநர் ரோஸ் அசா சே அரிஃபின் தெரிவித்துள்ளார்.

வெப்பநிலை 35 முதல் 37 டிகிரி செல்சியஸ் வரை (முதலாம் கட்டம்) பதிவாகும் பட்சத்தில், விளையாட்டுப் போட்டிகள், புறப்பாட நடவடிக்கைகள் உள்ளிட்ட அனைத்து வெளிப்புறச் செயல்பாடுகளும் உடனடியாக நிறுத்தி வைக்கப்படும். 

பள்ளிக் கூட்டங்களை மண்டபங்களுக்குள் மட்டுமே நடத்த வேண்டும் என்றும், போதிய காற்றோட்ட வசதியுடன் மாணவர்கள் அமர்ந்த நிலையில் குறைந்த நேரத்திற்குள் அவற்றை முடித்துக்கொள்ள வேண்டும் என்றும் அறிவுறுத்தப்பட்டுள்ளது.

மாணவர்களின் நலனைக் கருத்தில் கொண்டு இந்த இறுக்கமான கட்டுப்பாடுகள் விதிக்கப்பட்டுள்ளன.

தற்போது நிலவும் வறண்ட வானிலையைக் கருத்தில் கொண்டு, மாணவர்கள் பள்ளிச் சீருடைக்குத் பதிலாக விளையாட்டு உடைகளை அணிந்து வரக் கல்வித் துறை அனுமதி வழங்கியுள்ளது.

மேலும், மாணவர்கள் உடல் வெப்பத்தைத் தணிக்கவும், 'ஹீட் ஸ்ட்ரோக்' (Heat Stroke) எனப்படும் வெப்பத் தாக்கத்திலிருந்து தங்களைக் காத்துக்கொள்ளவும் அதிகளவில் தண்ணீர் குடிக்குமாறு கேட்டுக்கொள்ளப்படுகிறார்கள். மாணவர்கள் தங்களுக்குத் தேவையான குடிநீரைச் சொந்தமாக எடுத்து வருமாறும் வலியுறுத்தப்பட்டுள்ளது.

நேற்று அதிகாலை நிலவரப்படி பெர்லிஸ் முழுவதும் இரண்டாம் கட்ட வெப்ப அலை எச்சரிக்கை விடுக்கப்பட்டுள்ள சூழலில், இம்மாநிலத்தின் கல்விச் சூழல் தீவிரமாகக் கண்காணிக்கப்பட்டு வருகிறது. 

வானிலை மாற்றங்களுக்கு ஏற்பத் தயார் நிலையில் இருக்குமாறு ஆசிரியர்களுக்கும் பெற்றோர்களுக்கும் அறிவுறுத்தப்பட்டுள்ளது.

மாணவர்களின் கல்வி பாதிக்கப்படாத வகையில், பாதுகாப்பான சூழலை உறுதி செய்வதே கல்வித் துறையின் முதன்மை நோக்கம் என இயக்குநர் ரோஸ் அசா மீண்டும் உறுதிப்படுத்தினார்.

-கிரித்திக்கா