செலவுகள் 30% வரை உயர்கின்றன; உலகளாவிய பிரச்சினைகளால் உணவக உரிமையாளர்கள் பாதிப்பு: பிரெஸ்மா தலைவர்டத்தோ மொஹ்சின்

கோலாலம்பூர்:

உலகளாவிய பொருளாதார அழுத்தங்களைத் தொடர்ந்து, உணவு,  பானத் துறையில் செயல்பாட்டுச் செலவுகள் அதிகரித்துள்ளதால், உணவகத்துறை கடுமையாக  பாதிக்கப்பட்டுள்ளது.

குறிப்பாக பொருட்களின் விலை உயர்வு 10% முதல் 30% வரை இருக்கும் என மதிப்பிடப்பட்டுள்ளது என்று பிரெஸ்மாவின் தலைவர் டத்தோ முகமது மொஹ்சின் கூறினார்.

விநியோகச் சங்கிலித் தடைகள், அதிகரித்த தளவாடச் செலவுகள், தொடரும் சர்வதேசப் பொருளாதார நிச்சயமற்ற தன்மைகள் உள்ளிட்ட பல்வேறு காரணிகளால் இந்த நிலைமைக்கு நாம் தள்ளப்பட்டுள்ளோம்.

இந்த விலை உயர்வில் கோழிக்கறி, காய்கறிகள், சில இறக்குமதி செய்யப்பட்ட பொருட்கள் போன்ற மூலப்பொருட்கள் மட்டுமல்லாமல், பேக்கேஜிங், சமையல் எரிவாயு, பயன்பாட்டுச் செலவுகள் உள்ளிட்ட மூலப்பொருட்கள் அல்லாத பொருட்களும் அடங்கும் என்கிறார் டத்தோ மொஹ்சின்.

இவை குறிப்பிடத்தக்க உயர்வைப் பதிவு செய்துள்ளன. பதிவு செய்யப்பட்ட விலை உயர்வு, பொருட்களின் வகையைப் பொறுத்து மாறுபட்டது.

ஆனால் சராசரியாக இது 10% முதல் 30% வரை இருக்கும் என மதிப்பிடப்பட்டுள்ளது.

இந்த விலை உயர்வுப் போக்கு கடந்த ஆண்டின் நடுப்பகுதியில் இருந்து தொடங்கி, தற்போது வரை தொடர்கிறது என்று அவர் கூறினார்.

புவிசார் அரசியல் காரணங்கள், நாணய மாற்று விகித ஏற்ற இறக்கங்கள் இறக்குமதியின் விலையை நேரடியாகப் பாதிப்பதால், நிலைமை தொடர்ந்து அறைகூவலாக இருக்கும் என்று எதிர்பார்க்கப்படுகிறது. மேலும் விலை உயர்வுகள் இருக்கும் என்று நாங்கள் எதிர்பார்க்கிறோம்," என்று அவர் கூறினார்.

முன்னதாக, தற்போதைய உலகளாவிய நிச்சயமற்ற தன்மையால் அதிகரித்த செயல்பாட்டுச் செலவுகள் காரணமாக உணவு நிறுவனங்கள் விலைகளை உயர்த்தத் திட்டமிட்டுள்ளதாக சமூக ஊடகங்களில் ஒரு செய்தி வைரலானது.

இருப்பினும், செயல்பாட்டுச் செலவுகள் அதிகரித்த போதிலும், நுகர்வோருக்குச் சுமையாக இருப்பதைத் தவிர்ப்பதற்காகச் சில செலவுகளைத் தாங்களே ஏற்றுக்கொள்வது, அத்துடன் செயல்பாடுகளை மேம்படுத்துதல் மற்றும் கழிவுகளைக் குறைத்தல் உள்ளிட்ட பல நடவடிக்கைகள் மூலம் தனது சங்கம் உணவு விலைகளை ஒரு நியாயமான மட்டத்தில் பராமரிக்க முயற்சிப்பதாக டத்தோ மொஹ்சின் கூறினார்.

- பார்த்திபன் நாகராஜன்