நோன்புப் பெருநாளை முன்னிட்டு அலைபோல் திரண்ட வாகனங்களினால் நிரம்பிய முக்கிய நெடுஞ்சாலைகள்

கோலாலம்பூர்:

ஐதீல்ஃபிட்ரி விடுமுறை காரணமாக வாகனங்களின் எண்ணிக்கை திடீரென அதிகரித்ததன் விளைவாக, இன்று மாலை கிள்ளான் பள்ளத்தாக்கிலிருந்து வெளியேறும் நாட்டின் முக்கிய நெடுஞ்சாலைகளில் போக்குவரத்து நெரிசல் ஏற்பட்டுள்ளதாகத் தெரிவிக்கப்படுகிறது.

மலேசிய நெடுஞ்சாலை ஆணையம்  (LLM) செய்தித் தொடர்பாளர் ஒருவர், பெர்னாமாவிடம் பேசியபோது, வடக்கு நோக்கிய பாதையில், கிலோமீட்டர் (KM) 296.7-ல் நடந்த ஒரு மரண விபத்தைத் தொடர்ந்து, தாப்பா முதல் கோப்பெங் வரையிலான சாலையில் மிகப்பெரிய போக்குவரத்து நெரிசல் கண்டறியப்பட்டுள்ளதாகக் கூறினார்.

"விபத்து நடந்த இடத்தில் துப்புரவுப் பணிகள் முடிவடைந்திருந்தாலும், அப்பகுதியில் பெய்த மழை வாகனங்கள் மெதுவாக நகர்வதற்குக் காரணமாகிறது," என்று அவர் இன்று பெர்னாமாவிடம் தெரிவித்தார்.

கூடுதலாக, புகிட் லான்ஜான் முதல் ராவாங், தைப்பிங் முதல் புகிட் மெரா, ஜாவி முதல் பண்டார் காசியா, ஜூரு முதல் பெர்டாம் வரையிலான வழித்தடங்களிலும் போக்குவரத்து மெதுவாக நகர்வதாகத் தெரிவிக்கப்பட்டுள்ளது.

தெற்கு நோக்கிய வழிகளில், மலேசியா புத்ரா பல்கலைக்கழகத்திலிருந்து (UPM) கஜாங்கிற்கும்,  பண்டார் ஸ்ரீ புத்ராவிலிருந்து சிரம்பான் ஓய்வு (R&R) நிறுத்தத்திற்கும் வாகனங்கள் மெதுவாகச் சென்றதாகத் தெரிவிக்கப்பட்டது.

மேலும், போர்ட் டிக்க்சன் முதல் செனாவாங் வரையிலான வழியிலும், பெடாஸ் லிங்கி முதல் சிம்பாங் அம்பாட் வரையிலான வழியிலும், கூலாய் பகுதியில் செடெனாக் நோக்கியும் கனரகப் போக்குவரத்து நெரிசலை ஏற்படுத்தியது.

இதற்கிடையில், கிழக்குக் கடற்கரையில், கோம்பாக் டோல் பிளாசாவிலிருந்து புகிட் திங்கி வரை போக்குவரத்து நெரிசல் காணப்பட்டதாகத் தெரிவிக்கப்பட்டுள்ளது. அதே நேரத்தில், கிழக்குக் கடற்கரை விரைவுப்பாதை 2 (LPT2)-இல், செனே முதல் சுக்காய் வரையிலான சாலையிலும், கோலா திரெங்கானு டோல் பிளாசா பகுதியிலும் போக்குவரத்து மெதுவாக இருந்தது.

இன்று 50 சதவீத சுங்கக் கட்டண தள்ளுபடி சலுகையின் கடைசி நாள் என்பதால், இன்று நள்ளிரவு வரை போக்குவரத்து நெரிசல் தொடரும் என்று LLM எதிர்பார்க்கிறது.

இந்த ஆண்டு ஐதீல்ஃபிட்ரி கொண்டாட்டங்களை முன்னிட்டு, அரசாங்கம் முன்பே சுங்கக் கட்டண தள்ளுபடியை அறிவித்திருந்தது. இது நேற்று (மார்ச் 18) அதிகாலை 12:01 மணிக்கு அமலுக்கு வந்தது, மேலும் இந்தச் சலுகை இன்று இரவு 11:59 மணிக்கு முடிவடையும்.

நீண்ட வாகன வரிசைகளில் சிக்காமல் தவிர்க்க, வாகன ஓட்டிகள் தங்கள் பயணங்களைக் கவனமாகத் திட்டமிட்டு, 1-800-88-7752 என்ற எண்ணில் உள்ள LLM கட்டணமில்லா எண்ணைத் தொடர்புகொண்டு சமீபத்திய போக்குவரத்துத் தகவல்களைப் பெற அறிவுறுத்தப்படுகிறார்கள்.

-சங்கீர்த்தனா