சுற்றுலா துறையில் மலேசியா முன்னேற்றம்: VM2026க்காக ஒருங்கிணைந்த முயற்சி

கோலாலம்பூர்: 

2026-ஆம் ஆண்டுக்கான “Visit Malaysia” (VM2026) முயற்சியை முன்னிட்டு, மலேசியாவை தென்கிழக்காசியாவின் முன்னணி சுற்றுலா இலக்காக உருவாக்க, மலேசிய சுற்றுலா, பயண முகவர்கள் சங்கம் (MATTA) தனது திட்டங்களைச் சுற்றுலா, கலை, கலாச்சார அமைச்சகத்துடன் ஒருங்கிணைத்து வருகிறது.

MATTA தலைவர் நைஜல் வொங், ஆசியான் மையப்பகுதியில் அமைந்துள்ள மலேசியாவின் நிலை, குறைவான செலவு, வலுப்பெறும் நாணய மதிப்பு ஆகியவற்றால் போட்டித் திறனை அதிகரிக்கிறது.

“நவீன கட்டமைப்புகள், பயணிகளுக்கு உயர்ந்த வசதிகளை வழங்குவதுடன், மலேசியா இன்னும் குறைந்த செலவில் பயணிக்கக்கூடிய முக்கிய இடமாகத் திகழ்கிறது,” என்று அவர் மலேசியா சர்வதேச வர்த்தக, கண்காட்சி மையத்தில் நடைபெற்ற செய்தியாளர் சந்திப்பில் தெரிவித்தார்.

சீனாவிலிருந்து வரும் சுற்றுலா பயணிகள் எண்ணிக்கை நிலையான உயர்வைக் காண்கிறது என்றும், கோலாலம்பூர், பினாங்கு, பிற மாநிலங்களுக்கு நேரடி விமான சேவைகளை அதிகரிக்கும் திட்டங்கள் இதை மேலும் ஊக்குவிக்கும் என்றும் அவர் கூறினார்.

புதிய விமான வழித்தடங்கள் குறித்து பேச்சுவார்த்தைகள் நடைபெற்று வருகின்றன; அவை நிறைவேறிய பின், சுற்றுலா பயணிகளின் எண்ணிக்கை மேலும் அதிகரிக்கும் என எதிர்பார்க்கப்படுகிறது.

இதற்கிடையில், இந்தியாவும் வேகமாக வளர்ந்து வரும் சந்தையாக உருவெடுத்துள்ளதாகவும், இந்திய சுற்றுலாப் பயணிகளின் செலவுத்திறன் அதிகமாக இருப்பதாகவும் அவர் குறிப்பிட்டார்.

இந்தியாவுடனான கலாச்சார ஒற்றுமைகள் மலேசியாவை அவர்களுக்கு வசதியான, ஈர்க்கக்கூடிய சுற்றுலா இலக்காக மாற்றுகின்றன என்றும் அவர் கூறினார்.

மலேசியாவிற்கு வரும் சுற்றுலாப் பயணிகளின் மிகப்பெரிய ஆதாரங்களில் அண்டை நாடுகளும் தொடர்ந்து இருப்பதால், ஆசியான் நாடுகளுக்கு இடையேயான பயணம் ஒரு முக்கியக் கவனமாகத் தொடரும்.

மேலும், உலகளாவிய நிலைமைகள் உறுதியற்றதாக இருந்தாலும் மலேசியா, ஐரோப்பா போன்ற தூர சந்தைகளுடனான தொடர்புகளை தொடர்ந்து பேணும்.

மேலும், மேற்கு நாடுகளின் சுற்றுலாப் பயணிகளை ஈர்க்க விளம்பர பிரச்சாரங்கள், விற்பனை முயற்சிகள் தொடர்ந்து மேற்கொள்ளப்படும் என்றார் அவர்.

 உள்ளூர் சுற்றுலா துறை, தொழில்களை நிலைநிறுத்தவும், எதிர்கால சர்வதேச தேவைகளைச் சமாளிக்கவும் உதவும் என MATTA வலியுறுத்துகிறது.

“மொத்தத்தில், மலேசியா பிராந்திய, சர்வதேச, உள்நாட்டு சந்தைகளைச் சமநிலையுடன் கவனிக்கும் விரிவான அணுகுமுறையைப் பின்பற்றுகிறது,” என்று நைஜல் வொங் தெரிவித்தார்.

இந்த அணுகுமுறை, 2026, அதன் பின்னரும் சுற்றுலா இலக்குகளை அடைய மலேசியாவை வலுவான நிலைக்குக் கொண்டு செல்லும் என்றும் அவர் கூறினார்.

-சங்கீர்த்தனா