ரவாங்கில் ஆலய இடிப்புப் பணிகளை நிறுத்த செலாயாங் மாஜிஸ்திரேட் நீதிமன்றம் உத்தரவு

செலயாங்:

உயர் நீதிமன்றத்தின் தீர்ப்பு வரும் வரை, ரவாங்கில் உள்ள ஒரு இந்து கோவிலை இடிக்கும் பணியை யயாசன் குப்ரா தொடர முடியாது என்று செலாயாங் மாஜிஸ்திரேட் நீதிமன்றம் தீர்ப்பளித்துள்ளது.

நிலத்தின் நிலை குறித்து சர்ச்சை இருப்பதாக நீதிமன்றம் கண்டறிந்ததாக மாஜிஸ்திரேட் சாய் குவான் ஹாக் தெரிவித்தார்.

ஆலயம் கடந்த 1995 முதல் அந்த இடத்தில் உள்ளது.

தற்போதைய நில உரிமையாளர் 2021 முதல் மட்டுமே அந்த நிலத்தை சொந்தமாக வைத்துள்ளார்.

நிலைமை முறையாகக் கட்டுப்படுத்தப்படாவிட்டால், அந்த இடத்தில் உள்ள பிரச்சினைகள் பொதுமக்களிடையே பதற்றத்தை ஏற்படுத்தக்கூடும் என்பதையும் நீதிமன்றம் கணக்கில் எடுத்துக் கொண்டது.

நீதிமன்றம் அந்த இடத்தின் உண்மையான உரிமையாளரை தீர்மானிக்கும் முன், கோயில் நிர்வாகமும் குப்ரா அறக்கட்டளையும் எழுத்துப்பூர்வ அறிக்கைகள், துணை ஆவணங்களை சமர்ப்பிக்க வேண்டும் என்று சாய் கூறினார்.
முடிவு எடுப்பதற்கு முன் நீதிமன்றம் இரு தரப்பினரிடமிருந்தும் ஆவணங்களை ஆராயும் என்று அவர் கூறினார்.

ஸ்ரீ உச்சிமலை முனீஸ்வரர் கோயில் நிர்வாகத்தை பிரதிநிதித்துவப்படுத்திய வழக்கறிஞர்கள் ராஜேஷ் நாகராஜன், சச்ப்ரீத்ராஜ் சிங் சோஹன்பால், நீதிபதியின் தீர்ப்பு அந்த இடத்தில் தற்போதுள்ள நிலையே தொடர வேண்டும் என்று கூறினார்.

குப்ரா அறக்கட்டளைக்கு சொந்தமான நிலம் என்பதில் கோயில் குழு எந்தத் தகராறும் தெரிவிக்கவில்லை.

ஆனால் கோயிலின் ஒரு பகுதி இடிக்கப்பட்ட விதத்தை எதிர்த்ததாகவும், அது சட்டவிரோதமாக செய்யப்பட்டதாகவும் அவர் கூறியதாக ராஜேஷ் கூறினார்.

- பார்த்திபன் நாகராஜன்