பிபிபி கட்சியில் கல்வி உதவி அழைப்பு சேவை; அனைத்து மாணவர்களுக்கும் வழிகாட்டும்: விக்னேஷ்

கோலாலம்பூர்:

பிபிபி கட்சியில் கல்வி உதவி அழைப்பு சேவை அனைத்து மாணவர்களுக்கும் வழிகாட்டும்.

பிபிபி கட்சியின் கல்வி பிரிவு தலைவர் விக்னேஷ் கிருஷ்ணகுமார் இதனை தெரிவித்தார்.

மாணவர்களின் கல்வி மேம்பாட்டிற்கு உதவும் வகையில் பிபிபி கட்சி இன்று  கல்வி உதவி அழைப்பு சேவையை (Education Careline) அதிகாரப்பூர்வமாக தொடங்கியது.
பிபிபி கட்சியின் கல்வி பிரிவு மற்றும் ஏற்பாட்டுக் குழுவின் அர்ப்பணிப்பு, உறுதிப்பாட்டிற்கு நான் பாராட்டுகளைத் தெரிவிக்க விரும்புகிறேன்.

பிபிபி கட்சியின் தேசிய தலைவர் டத்தோ டாக்டர் லோகபாலா இன்று மலாயா பல்கலைக்கழகத்தில் நடைபெற்ற விழாவில் இந்த கல்வி அழைப்பு உதவி சேவையை அதிகாரப்பூர்வமாக தொடக்கி வைத்து வாழ்த்தினார்.

இந்த முயற்சி பல மாதங்களாக நடந்த கவனமான திட்டமிடல், ஒத்துழைப்பு மற்றும் கல்வி சமூகத்தின்மீது உள்ள ஆழமான பொறுப்புணர்வின் பிரதிபலிப்பாகும்.

கல்வி எப்போதும் பிபிபியின் முக்கிய போராட்டங்களிலும் முன்னுரிமைகளிலும் ஒன்றாக இருந்து வருகிறது.

ஆரம்பத்திலிருந்தே, கல்வி என்பது சமூக முன்னேற்றம், மரியாதை மற்றும் நீண்டகால வளர்ச்சியின் அடித்தளம் என்று நாங்கள் நம்பி வந்தோம்.

ஆனால், எங்கள் போராட்டம் கல்வி அணுகலைப் பற்றியது மட்டுமல்ல. அது சமமான கல்வியைப் பற்றியது.

மாணவர்கள், குடும்பங்கள் எதிர்கொள்ளும் சவால்களை எவ்வாறு களைவது தொடர்பாக இந்த கல்வி மையம் உதவும்.

இன்றைய கல்வி ஒரு தனித்த பிரச்சினை அல்ல. அது சிக்கலானதும் பல பரிமாணங்களைக் கொண்டதுமானதாகும்.

சவால்கள் முன் பள்ளி மற்றும் ஆரம்பக் குழந்தைப் பருவத்திலேயே தொடங்குகின்றன.

இதில் சிறப்பு தேவைகள் அடையாளம் காணுதல் மற்றும் ஆரம்ப தலையீடு அடங்கும். இவை தொடக்க மற்றும் மேல்நிலை கல்வி வரை தொடர்கின்றன.

அங்கு மாணவர்கள் கல்வி மாற்றங்கள், பாடத் தேர்வுகள், அமைப்பு சார்ந்த அழுத்தங்களை எதிர்கொள்கிறார்கள்.

உயர்கல்வி நிலைகளில், சவால்கள் மேலும் விரிவடைகின்றன; அதில் நிதி கட்டுப்பாடுகள், உதவித்தொகை அணுகல், கல்வி அமைப்பு பாதைகள் மற்றும் சம வாய்ப்புகள் அடங்கும்.
முறையான கல்வியைத் தாண்டியும், வேகமாக மாறும் உலகில் ஆயுள் முழுவதும் கற்றல் மிகவும் அவசியமாகியுள்ளது.

இந்த புரிதலின் அடிப்படையில் தான் பிபிபி கல்வி உதவி அழைப்பு சேவை (Education Careline) நிறுவப்பட்டது என்று அவர் சொன்னார்.

- பார்த்திபன் நாகராஜன்