முதலீட்டு மோசடியில் சிக்கி RM6.6 லட்சத்திற்கும் மேல் இழந்த அமெரிக்க குடிமகன்

கோலாலம்பூர்: 

அமெரிக்காவைச் சேர்ந்த ஒரு நபர், 'Bos Pro' அல்லது 'Moo Moo Chat' என்ற செயலி மூலம் முதலீடு செய்ததில் RM664,278 இழப்பைச் சந்தித்துள்ளார்.

74 வயதான அந்தப் பாதிக்கப்பட்ட நபர், உள்ளூர் பல்கலைக்கழகத்தில் ஆலோசகராகவும் பகுதி நேர விரிவுரையாளராகவும் பணியாற்றி வருகிறார். கடந்த ஆண்டு நவம்பர் மாதம் முதல் இந்த முதலீட்டு திட்டத்தில் அவர் ஈடுபட்டு வந்துள்ளார்.

கடந்த ஆண்டு நவம்பர் 26ஆம் தேதி முதல் இந்த முதலீட்டு திட்டத்தில் சேர்ந்த பாதிக்கப்பட்டவர், சீனப் பெண் என சந்தேகிக்கப்படும் ஒருவருடன் தொடர்பில் இருந்ததாக வங்சா மாஜு மாவட்ட காவல் துறை தலைவர், உதவி ஆணையர் முஹம்மத் லாசிம் இஸ்மாயில் தெரிவித்தார்.

“பாதிக்கப்பட்ட நபரும் சந்தேக நபரும் 'WhatsApp' மூலம் தொடர்ந்து தொடர்பு கொண்டு 'Moo Moo Chat' முதலீடு குறித்து விவாதித்து வந்தனர்.

“பின்னர், சந்தேக நபர், முதலீடு செய்வதற்காக 'Bos Pro' செயலியைப் பதிவிறக்கம் செய்யுமாறு வழிகாட்டியதாகக் கூறப்படுகிறது.

“இந்தச் செயலியின் மூலம், பாதிக்கப்பட்ட நபர் படிப்படியாக 11 வெவ்வேறு வங்கிகளுக்கு, பெயர்களுக்கு மொத்தம் RM668,278 பரிவர்த்தனை செய்துள்ளார்,” என்று அவர் தெரிவித்தார்.

மேலும், கடந்த ஜனவரி 30ஆம் தேதி, வாக்குறுதி அளிக்கப்பட்ட லாபத்தைப் பெற முடியாததால், பாதிக்கப்பட்டவர் சந்தேகம் அடைந்ததாக கூறினார்.

“அதனைத் தொடர்ந்து, கடந்த வெள்ளிக்கிழமை காலை 10 மணிக்கு அவர் காவல் நிலையத்தில் புகார் அளித்தார். இந்த வழக்கு குற்றவியல் பிரிவு 420ன் கீழ் விசாரிக்கப்பட்டு வருகிறது,” என்றும் அவர் கூறினார்.

-சங்கீர்த்தனா