பள்ளியில் பொதி வெடித்து மூவர் காயம்

புவெனோஸ் ஐரஸ்: 

அர்ஜென்டினாவின் புவெனோஸ் ஐரஸ் நகரில் உள்ள ஜெண்டார்மெரி உயர்நிலைப் பள்ளியில் சந்தேகத்திற்கிடமான ஒரு பொதி வெடித்ததில் மூன்று பாதுகாப்பு அதிகாரிகள் காயமடைந்தனர்.

காயமடைந்தவர்களில் இருவர் மருத்துவமனைக்கு கொண்டு செல்லப்பட்டனர். இருப்பினும், அவர்களின் நிலை உயிருக்கு ஆபத்தானதாக இல்லை என்று தேசிய பாதுகாப்பு அமைச்சகம் தகவல் வெளியிட்டுள்ளது.

இந்தச் சம்பவம் நடந்தபோது, பாதுகாப்புப் பணியாளர்கள் பல மாதங்களுக்கு முன்பு பெறப்பட்டு பள்ளி வளாகத்தில் வைத்திருந்த ஒரு பொதியை ஆய்வு செய்து கொண்டிருந்தனர்.

அந்தப் பொதி திறக்கப்பட்ட உடனே வெடிப்பு ஏற்பட்டது. சம்பவம் நடந்த கட்டிடம் அரசு தலைமையகத்திலிருந்து சுமார் 800 மீட்டர் தொலைவில் அமைந்துள்ளது.

இதையடுத்து, அதிகாரிகள் அந்தப் பகுதியை மூடி, அருகிலுள்ள சில கட்டிடங்களைக் காலி செய்தனர். மேலும், குண்டு செயலிழப்பு பிரிவும் சம்பவ இடத்திற்கு அனுப்பப்பட்டது.

உள்ளூர் நாளிதழான ‘லா நாசியோன்’ வெளியிட்ட தகவலின்படி, அந்தப் பொதி பள்ளியின் முன்னாள் முதல்வருக்காக அனுப்பப்பட்டதாகவும், அவர் இந்த சம்பவத்தில் காயமடைந்ததாகவும் தெரிவிக்கப்பட்டுள்ளது.

அர்ஜென்டினா தேசிய ஜெண்டார்மெரி என்பது எல்லைப் பகுதிகள், முக்கிய இடங்கள், உள்நாட்டு பாதுகாப்பு நடவடிக்கைகளில் செயல்படும் கூட்டாட்சி பாதுகாப்புப் படையாகும்.

-சங்கீர்த்தனா