சாலையை கடந்த காட்டு மாடு மோதி மோட்டார் சைக்கிளோட்டி பலி 

ஜாசின்:

ஏ.எம்.ஜே. செர்காம் சாலையில் ஞாயிற்றுக்கிழமை நள்ளிரவு நேரத்தில் சாலையை திடீரென கடந்த ஒரு காட்டு மாடு மோட்டார் சைக்கிள் மீது மோதியதில், மோட்டார் சைக்கிள் ஓட்டுநர் ஒருவர் உயிரிழந்தார்; மற்றொருவர் காயமடைந்தார்.

ஜாசின் மாவட்ட காவல் துறைத் தலைவர், சூப்பிரிண்டெண்ட் லீ ராபர்ட் கூறுகையில், இந்த விபத்து குறித்து இரவு சுமார் 11 மணியளவில் தகவல் கிடைத்ததாக தெரிவித்தார்.

ஆரம்பகட்ட விசாரணைகளின் படி, 25 வயதுடைய அந்த இரண்டு மோட்டார் சைக்கிள் ஓட்டுநர்களும் மெர்லிமாவிலிருந்து ஜாசின் நோக்கி பயணித்துக் கொண்டிருந்தனர். விபத்து நடந்த இடத்தை அணுகியபோது, வலது பக்கத்திலிருந்து இடது பக்கம் நோக்கி ஒரு காட்டு மாடு திடீரென சாலையை கடந்ததால், இருவரும் தவிர்க்க முடியாமல் அந்த மாடு மீது  மோதினர்,” என அவர் கூறினார்.

மேலும் அவர் கூறுகையில், மோதலின் விளைவாக இரண்டு மோட்டார் சைக்கிள்களும் சாலையின் இடது வழித்தடத்துக்கு வழுக்கி சென்றதாக தெரிவித்தார்.

“ஒரு நபர் கடுமையான காயங்களுடன் சம்பவ இடத்திலேயே உயிரிழந்தார். மற்றொரு நபருக்கு முகப்பகுதியில் காயம் ஏற்பட்டதுடன், மேலதிக சிகிச்சைக்காக மலாக்கா மருத்துவமனைக்கு அனுப்பப்பட்டார்,” என்றார் அவர்.

இந்த விபத்தை நேரில் கண்டவர்கள் அல்லது சம்பவம் தொடர்பான தகவல்கள் உள்ளவர்கள், விசாரணைக்கு உதவுமாறு கேட்டுக் கொள்ளப்படுகின்றனர்.

தகவல் வழங்க விரும்புபவர்கள், விசாரணை அதிகாரி இன்ஸ்பெக்டர் வான்  நூராலியா அசிகின் வான் இப்ராஹிம் (தொலைபேசி: 011-6464 8182) அல்லது ஜாசின் மாவட்ட காவல் தலைமையகத்தின் போக்குவரத்து புகார் இடம் (06-529 2222, நீட்டிப்பு 260) ஆகியவற்றை தொடர்பு கொள்ளலாம்.

- கிரித்திகா