ASEAN 2025: கேஎல் அமைதி ஒப்பந்தத்தின் முதல் முடிவு; 18 கம்போடிய வீரர்கள் விடுவிக்கப்படுவார்கள்: தாய்லாந்து பிரதமர் 

கோலாலம்பூர்:

இரு அண்டை நாடுகளுக்கும் இடையே கையெழுத்தான அமைதி ஒப்பந்தத்தின் ஒரு பகுதியாக, தடுத்து வைக்கப்பட்டுள்ள 18 கம்போடிய வீரர்களை தாய்லாந்து விடுவிக்கும், இது அவர்களின் பகிரப்பட்ட எல்லையில் ஸ்திரத்தன்மை, நம்பிக்கையை மீட்டெடுப்பதில் ஒரு புதிய மைல்கல்லைக் குறிக்கிறது.

கோலாலம்பூர் (கேஎல்) அமைதி ஒப்பந்தம் இன்று கையெழுத்தானதைத் தொடர்ந்து இந்த முடிவு எடுக்கப்பட்டுள்ளதாக தாய்லாந்து பிரதமர் அனுடின் சார்ன்விரகுல் கூறினார். இது அமைதி, இறையாண்மை, பரஸ்பர மரியாதைக்கான இரு தரப்பினரின் உறுதிப்பாட்டை பிரதிபலிக்கிறது.

கேஎல் அமைதி ஒப்பந்தத்தின் கீழ், பாதுகாப்பை உறுதி செய்வதற்கும் சமூகங்களுக்கிடையில் நம்பிக்கையை மீண்டும் கட்டியெழுப்புவதற்கும் எல்லையிலிருந்து கனரக ஆயுதங்களை உடனடியாக அகற்றுவது உட்பட அனைத்து ஒப்புக் கொள்ளப்பட்ட அம்சங்களையும் இரு தரப்பினரும் செயல்படுத்தத் தொடங்கும் என்று அனுடின் கூறினார்.

"இன்று தாய்லாந்து, கம்போடியாவிற்கு இடையே ஒரு புதிய அத்தியாயம் எழுதப்பட்டுள்ளது. நாங்கள் அமைதியை நோக்கி ஒரு உறுதியான முடிவை எடுக்கிறோம்," என்று 47வது ஆசியான் உச்சி மாநாடு, தொடர்புடைய உச்சிமாநாடுகளுக்கு இடையே கோலாலம்பூர் மாநாட்டு மையத்தில் நடந்த கையெழுத்து விழாவின் போது அவர் கூறினார்.

அனுடினுக்கும் கம்போடிய பிரதமர் ஹுன் மானெட்டுக்கும் இடையிலான ஒப்பந்தம் ஆசியான் தலைவர் டத்தோஸ்ரீ அன்வார், அமெரிக்கஅதிபர் டொனால்ட் டிரம்ப் என்ற முன்னிலையில் இன்று கையெழுத்தானது. 

ஆசியான் ஒற்றுமையை நிலைநிறுத்துவதில் அன்வரின் தலைமைத்துவத்திற்கும், தாய்லாந்துக்கும் கம்போடியாவிற்கும் இடையிலான "அமைதிக்கான அவரது தனிப்பட்ட அர்ப்பணிப்புக்கும்" டிரம்பிற்கும் அனுடின் நன்றி தெரிவித்தார்.

"ஜூலை 28 அன்று மலேசியாவில் போர்நிறுத்தத்திற்கு ஒப்புக்கொண்டதிலிருந்து நாங்கள் நீண்ட தூரம் வந்துவிட்டோம். அதன் பின்னர் நடந்த விவாதங்கள் இந்த முக்கியமான முடிவுக்கு வழிவகுத்தன, இது இன்று நாங்கள் கூட்டுப் பிரகடனத்தில் கையெழுத்திட்டுள்ளோம்.

"இந்த தருணத்திற்கு எங்களை இட்டுச் சென்ற ஹுன் மானெட்டின் ஒத்துழைப்புக்கும் ஆதரவுக்கும் நான் நன்றி சொல்ல வேண்டும்," என்று அவர் கூறினார்.

இந்தப் பிரகடனத்தை முழுமையாகச் செயல்படுத்துவது நீடித்த அமைதிக்கான அடித்தளத்தை வழங்கும் என்று தாய்லாந்து தலைவர் வலியுறுத்தினார்.

- ஃபிதா