KLIA விமான நிலையத்தில் டிரம்பின் தன்னிச்சையான நடனம் அனைவரின் கவனத்தையும் ஈர்த்தது

சிப்பாங்:

அமெரிக்க அதிபர் டொனால்ட் டிரம்ப் மலேசியாவுக்கு வந்தவுடன், உள்ளூர் பாரம்பரிய நடனக் கலைஞர்களுடன் தன்னிச்சையாக நடனமாடி அனைவரையும் கவர்ந்தார்.

டிரம்பை பிரதமர் டத்தோஸ்ரீ அன்வார் இப்ராஹிம் விமான நிலையத்திற்கு சென்று சிறப்பாக வரவேற்றார்.

மேலும் வரவேற்பின் அடையாளமாக மலேசிய கலாச்சார நடன நிகழ்ச்சியும் நடைபெற்றது.

ஏர் ஃபோர்ஸ் ஒன், போயிங் 747-200பி விமானத்திலிருந்து இறங்கிய அவர், சிரித்துக் கொண்டே நடனக் கலைஞர்களின் தாளத்தைப் பின்பற்றுவதைக் காண முடிந்தது.

இந்த வரலாற்றுச் சிறப்புமிக்க தருணத்தைக் காண வந்திருந்த கூட்டத்தினரிடமிருந்து இந்த நடவடிக்கை ஆரவாரத்தையும் கைதட்டலையும் பெற்றது.

அதன் பின்னர் நடனக் கலைஞர்களுக்கு தனது பாராட்டைத் தெரிவிக்கும் விதமாக சல்யூட் வைத்தார். 

தொடர்ந்து அவரிடம் மலேசியக் கொடியும் அமெரிக்கக் கொடியும் தரப்பட்டது. அதனை வாங்கிக் கொண்டு சிறிது நேரம் அசைத்துக் காட்டினார்.

இறுதியாக அமெரிக்க அதிபரும் பிரதமர் அன்வார் இப்ராஹிமும் ஒரே காரில் விமான நிலையம் விட்டுப் புறப்பட்டனர்.

- பார்த்திபன் நாகராஜன்