சபா மாநிலத் தேர்தலில் மஇகா வேட்பாளரை நிறுத்தாது: டத்தோஸ்ரீ  சரவணன்

கோலாலம்பூர்:

சபா மாநிலத் தேர்தலில் மஇகா வேட்பாளரை நிறுத்தாது என்று அதன் துணைத் தலைவர் டத்தோஸ்ரீ எம். சரவணன் கூறினார்.

வரவிருக்கும் சபா மாநிலத் தேர்தலில் மஇகா வேட்பாளரை நிறுத்தாது என்பதை உறுதிப்படுத்துகிறேன்.

அரசியல் யதார்த்தத்தையும் கட்சியின் திறன்களையும் கருத்தில் கொண்ட பின்னரே இந்த முடிவு எடுக்கப்பட்டது.

எங்கள் திறன்கள் அல்லது எங்கள் திறன்களின் வரம்புகளை நாங்கள் அறிந்திருக்கிறோம். ஆக சபாவில் போட்டியிடுவதை நாங்கள் லட்சியமாக இல்லை.

மஇகாவின் உதவித் தலைவர் டி. முருகையா, சபா மாநில சட்டமன்றத் தொகுதியில் போட்டியிடும் என்ற கூற்றை நிராகரித்த அரசியல் ஆய்வாளர்களின் கருத்து குறித்து டத்தோஸ்ரீ சரவணன் இவ்வாறு தெரிவித்தார். 

மாநிலத்தின் சிக்கலான அரசியல் சூழலையும், இந்திய வாக்காளர்களின் எண்ணிக்கை குறைவாக இருப்பதையும் காரணம் காட்டி அவர் இவ்வாறு கூறினார்.

மஇகா ஒரு தீபகற்பக் கட்சியாக சந்தேகங்களைச் சமாளிப்பதில் சிரமங்களை எதிர்கொள்ளும் என்று அகாடமி நுசாந்தராவைச் சேர்ந்த அஸ்மி ஹசன், சபா பல்கலைக்கழகத்தைச் சேர்ந்த லீ குவோக் தியுங் ஆகியோர் தெரிவித்தனர்.

மேலும் உள்ளூர் கட்சிகளின் ஆதிக்கத்தைப் பற்றிக் குறிப்பிடுகையில், சபா மஇகா உள்ளூர் கட்சிகளால் நிரம்பிய அரசியல் சூழலில் உள்ளது.

இது சாத்தியமான கூட்டாளிகளிடையே அதிருப்தியை ஏற்படுத்தாமல் வெற்றி பெறக்கூடிய இடங்களைப் பெறுவதைக் கடினமாக்கும் என்றும் லீ கூறினார்.

சம்பந்தப்பட்ட இரண்டு ஆய்வாளர்களின் கூற்றுகளையும் நான் ஒப்புக் கொள்கிறேன் என டத்தோஸ்ரீ சரவணன் கூறினார்.

- பார்த்திபன் நாகராஜன்