ஆசியான் உச்சி மாநாட்டில் கலந்துகொள்ள உலகத் தலைவர்கள் டிரம்ப், லூலா, ரமபோசா ஆகியோர் வருகை தருவார்கள்: அன்வார் நம்பிக்கை 

சைபர்ஜெயா:

அக்டோபர் மாதம் மலேசியாவில் நடைபெறும் 47ஆவது ஆசியான் உச்சி மாநாட்டில் கலந்து கொள்ள எதிர்பார்க்கப்படும் உலகத் தலைவர்களில் அமெரிக்க அதிபர் டொனால்ட் டிரம்ப், சீன அதிபர் ஜி ஜின்பிங், பிரேசில் அதிபர் லூயிஸ் இனாசியோ லுலா டா சில்வா, தென்னாப்பிரிக்க அதிபர் சிரில் ராமபோசா ஆகியோர் அடங்குவர் என்று பிரதமர் டத்தோஸ்ரீ அன்வார் இப்ராஹிம் தெரிவித்தார்.

ஆசியான் தலைவராக மலேசியாவைப் பிரதிநிதித்துவப்படுத்தும் அன்வர், லூலாவிடமிருந்தும் ராமபோசாவிடமிருந்தும்  நேர்மறையான உறுதிப்படுத்தல்கள் பெறப்பட்டதாகக் கூறினார், 

அதே நேரத்தில் டிரம்ப் சமீபத்திய தொலைபேசி உரையாடலுக்குப் பிறகு தனது பங்கேற்பை உறுதிப்படுத்தி உள்ளார் என்று பிரதமர் கூறினார்.

“அவர்களின் வருகை நீடித்த மதிப்புமிக்க முடிவுகளைத் தருவதை நாம் உறுதி செய்ய வேண்டும். உலகின் கண்கள் நம் மீது இருக்கும். எனவே நாம் சந்தர்ப்பத்திற்கு ஏற்ப உயர வேண்டும், ”என்று அவர் கூறினார்.

தென்கிழக்கு ஆசிய நாடுகளின் சங்கமம் - ஆசியான் நிறுவப்பட்டதன் 58வது ஆண்டு நிறைவை முன்னிட்டு இன்று நடைபெற்ற 58வது ஆசியான் தினக் கொண்டாட்டத்தில் உரையாற்றும் போது அன்வார் இவ்வாறு கூறினார். 

2025 ஆம் ஆண்டிற்கான ஆசியான் தலைவராக உள்ள மலேசியா, கோலாலம்பூரில் "உள்ளடக்கம் மற்றும் நிலைத்தன்மை" என்ற கருப்பொருளின் கீழ் உச்சிமாநாட்டை நடத்தும் என்றார் பிரதமர். 

உள்நாட்டு கவலைகளுக்கு அப்பால் அண்டை நாடுகள், பிராந்திய ஒற்றுமை, உலகின் தேவைகளைக் கருத்தில் கொண்ட கடந்த காலத் தலைவர்களின் தொலைநோக்குப் பார்வை, பங்களிப்புகள், சுதந்திரத்திற்குப் பிந்தைய அறைகூவல்கள், புவிசார் அரசியல் பதற்றங்கள் இருந்தபோதிலும் அவை பொருத்தமானதாகவே இருந்தன என்று அன்வர் கூறினார்.

"ஆசியானின் நிறுவனர்கள் நமது முன்னேற்றத்தை பெருமையுடன் பார்ப்பார்கள் என்று நான் துணிச்சலுடன் கூறுகிறேன்," என்று அவர் கூறினார்.

- ஃபிதா