கிளந்தானில் குற்றச்செயல்கள் குறைந்தாலும், பாலியல் வன்முறை மற்றும் ஆயுதக் கொள்ளைகள் அதிகரிப்பு

கோத்தா பாரு: 
கிளந்தான் மாநிலத்தில் இந்த ஆண்டின் முதல் ஆறு மாதங்களில் குற்றச்செயல்கள் குறைந்த நிலையில், பாலியல் வன்கொடுமைகள் மற்றும் ஆயுதம் பயன்படுத்தி கொள்ளை இடும் சம்பவங்கள் அதிகரித்துள்ளன. இதற்காக மேம்பட்ட கண்காணிப்பு மற்றும் வலுவான நடவடிக்கைகள் அவசியம் என காவல் துறை கருதுகின்றது.

ஜனவரி முதல் ஜூன் மாதம் வரையிலான காலத்தில் கிளந்தானில் 967 குற்றச்செயல்கள் பதிவு செய்யப்பட்டன. இது கடந்த ஆண்டு இதே காலப்பகுதியில் பதிவு செய்யப்பட்ட 1,129 வழக்குகளை விட 162 வழக்குகள் குறைவாகும் என மாநில போலீஸ் தலைவர் டத்தோ மொஹ்மட் யூசோஃப் மமட் தெரிவித்தார்.

ஆனால், இந்தக் காலப்பகுதியில் வன்முறை குற்றங்கள் அதிகரித்துள்ளன. பாலியல் வன்கொடுமை சம்பவங்கள் கடந்த ஆண்டைவிட 19ஆக அதிகரித்து, 26.8 சதவீத உயர்வை எட்டியுள்ளன. அதேபோல், துப்பாக்கி கொண்டு நடைபெறும் கொள்ளைகள் 400 சதவீதம் அதிகரித்துள்ளன. இந்த ஆண்டில் மட்டும் நான்கு ஆயுதக் கொள்ளை சம்பவங்கள் பதிவாகியுள்ளன. தாக்குதல் சம்பவங்களும் 18.8 சதவீதம் அதிகரித்துள்ளன.

மருந்து தொடர்பான குற்றங்கள் மட்டும் 1 விழுக்காடு குறைந்துள்ளது. 2024ஆம் ஆண்டு இதே காலத்தில் 13,978 வழக்குகள் இருந்த நிலையில், இந்த ஆண்டில் அது 13,865 ஆக குறைந்துள்ளது. மருந்து சம்பந்தப்பட்ட கைது எண்ணிக்கையும் 3 சதவீதம் குறைந்துள்ளதாக கூறப்படுகிறது.

ஆனால் பறிமுதல் செய்யப்பட்ட போதைப்பொருட்களின் மதிப்பு மலேசிய ரிங்கிட்  13.4 மில்லியனாக உயர்ந்துள்ளது. இது கடந்த ஆண்டின் முதல் பாதியில் இருந்த  RM 6.8 மில்லியனை விட இரட்டிப்பாக உள்ளது. இது போதைப்பொருள் கடத்தல் மற்றும் விநியோக வலையங்களை தடுக்க போலீசார் மேற்கொண்ட போராட்டத்தில் ஒரு முக்கிய வெற்றியாக கருதப்படுகிறது என மாநில போலீஸ் தலைவர் குறிப்பிட்டார்.