ஹார்மோஸ் நீரிணை மூடல்: ஈரானுக்கு ரூபியோ கண்டனம் 

வாஷிங்டன்:

முக்கிய கப்பல் போக்குவரத்து வழியான ஹார்மோஸ் நீரிணையை மூடும் ஈரானின் நடவடிக்கைக்கு அமெரிக்க வெளியுறவு அமைச்சர் மார்கோ ரூபியோ கண்டனம் தெரிவித்துள்ளார். 

உலகளவில் கச்சா எண்ணெய் ஏற்றுமதியைச் சீர்குலைக்கும் வகையிலான இந்த முடிவுக்கு  ஈரானிய நாடாளுமன்ற உறுப்பினர்கள் ஆதரவு அளித்ததைத் தொடர்ந்து அவர் எச்சரிக்கை விடுத்துள்ளார். 

இது ஈரான் அரசு மேற்கொள்ளும் தவறான முடிவு என்று ரூபியோ கூறினார்.

இஸ்ரேலுக்கும் ஈரானுக்கும் இடையிலான போரில் பெரிய பங்கேற்பை  குறிக்கும் வகையில் ஈரானின் முக்கிய அணுசக்தி தளங்கள் மீது அமெரிக்கா வான் தாக்குதல்களை நடத்திய 24 மணி நேரத்திற்குள் ரூபியோவின் இந்த எச்சரிக்கை வெளியாகியுள்ளது.

ஈரானுக்கும் ஓமனுக்கும் இடையிலான சுமார் 55 கிலோமீட்டர் அகலமுள்ள முக்கிய கப்பல் போக்குவரத்தை மூடுவது தவறான செயலாகும் என்று ரூபியோ தெரிவித்தார்.

மற்ற நாடுகளின் பொருளாதாரங்களை மிக மோசமாக பாதிக்கும் என்று  ரூபியோ கூறினார்.

இது ஒரு பெரிய அளவிலான போராட்டமாக இருக்கும் என்று நான் நினைக்கிறேன். அதற்கு நாங்கள் மட்டுமல்ல, மற்றவர்களும் பதிலடி கொடுக்க வேண்டும் என்றார் அவர்.

- அஸ்வினி செந்தாமரை