ஜம்மு காஷ்மீரில் மர்ம நோய்க்கு 17 பேர் உயிரிழப்பு, 200 பேர் தனிமை

ஜம்மு:

ஜம்மு காஷ்மீரின் ரஜோரி மாவட்டத்தில் மர்மநோயால் பாதிக்கப்பட்டு 17 பேர் உயிரிழந்ததால் அந்தக் குடும்பத்தினருடன் தொடர்பில் இருந்த 200க்கும் மேற்பட்டோர் தனிமைப்படுத்தப்பட்டனர்.

ரஜோரி மாவட்ட பாதால் கிராமத்தில் கடந்த ஒன்றரை மாதத்தில் மூன்று குடும்பங்களைச் சேர்ந்த 13 குழந்தைகள் உள்பட 17 பேர் மர்மநோயால் உயிரிழந்தனர்.

இது தொடர்பாக ஒன்றிய அரசு குழு தொடர் ஆய்வு, விசாரணை மேற்கொண்டு வருகிறது.

உயிரிழந்த 17 பேருக்கும் பொதுவான காரணியாக மூளையிலும் நரம்பு மண்டலத்திலும் சேதம் கண்டறியப்பட்டுள்ளது.

இந்நிலையில், உயிரிழந்தவர்களின் குடும்பத்தினருடன் தொடர்பில் இருந்த 200க்கும் மேற்பட்டோர் அடையாளம் காணப்பட்டு மருத்துவமனையில் அமைக்கப்பட்டுள்ள தனிமை முகாமில் வைக்கப்பட்டுள்ளனர்.

- ஆர்யன்