சுங்கைபூலோ மக்கள் நல இயக்கத்தின் தீபாவளி விருந்தோம்பல்: 2,000 பேர் பங்கேற்பு

சுங்கைபூலோ:

சுங்கை பூலோ மக்கள் நல இயக்கத்தின் ஏற்பாட்டில் நடத்தப்பட்ட இந்த விருந்தோம்பல் நிகழ்ச்சியில் சுமார் 2,000 பேர் கலந்து கொண்டனர். 

சுங்கைபூலோ பிஆர்பி 7/ 2 வலைப்பந்து மைதானத்தில் சுற்றுவட்டாரத்தைச் சேர்ந்த 300 வசதிக் குறைந்த குடும்பங்களுக்கு அத்தியாவசியப் பொருட்கள் அடங்கிய பொட்டலங்கள் வழங்கப்பட்டன. 

முகப்பிடங்கள் அமைக்கப்பட்டு அனைவருக்கும் உணவுகள் பரிமாறப்பட்டன. 

மேலும் புகழ்பெற்ற உள்ளூர் கலைஞர்களின் படைப்புளும் இதில் இடம் பெற்றன. நிகழ்ச்சியின் சிறப்பு அங்கமாக அதிர்ஷ்ட குலுக்கும் நடத்தப்பட்டன.  

அதில் முதல் பரிசாக மோட்டார் சைக்கிள் வழங்கப்பட்டது. தொடர்ந்து இருவருக்கு தமிழ்நாடு சென்று வர விமான டிக்கெட்டுகளும் வழங்கப்பட்டன. 

இது தவிர  தங்கச் சங்கிலியும் தொலைக்காட்சி பெட்டியும் இந்த அதிர்ஷ்ட குலுக்கலில் வழங்கப்பட்டன. 

இந்த நிகழ்ச்சியில் சுற்றுவட்டாரத்தைச் சேர்ந்த பிரமுகர்களும் கலந்து கொண்டனர்.

அதிலும் சுங்கைபூலோ நாடாளுமன்ற உறுப்பினர் டத்தோஸ்ரீ ஆர்.ரமணனை பிரதிநிதித்து அவரின் உதவியாளர் கைரி பங்கேற்றார்.

இந்த நிகழ்ச்சி குறித்து பேசிய ஏற்பாட்டுக் குழுவினர், எங்கள் இயக்கம் ஒவ்வொரு ஆண்டும் தீபாவளி விருந்தோம்பல் நிகழ்ச்சியை நடத்தி வருகின்றது. 

அதே சமயம் நாங்கள் அவ்வப்போது எங்களால் முடிந்த சமூக நல உதவிகளை செய்து வருகின்றோம் என்று ஏற்பாட்டுக் குழுவைச் சேர்ந்த நெடுஞ்செழியன், கோகுலன், தமிழரசு ஆகியோர் கூறினர்.

- பார்த்திபன் நாகராஜன்