மின்னிலக்க உலகில் அனைவரும் இணைந்திருப்பது உறுதி செய்யப்படும்: பிரதமர் உறுதி

புத்ராஜெயா:

அரசாங்கம் செயல்படுத்தி வரும் திட்டங்களின் முடிவில், அனைத்து மலேசியர்களும் மின்னிலக்க (டிஜிட்டல்) உலகில் அனைவரும் இணைந்திருப்பது உறுதி செய்யப்படும் எனப் பிரதமர் டத்தோ ஸ்ரீ இஸ்மாயில் சப்ரி யாகூப் தெரிவித்துள்ளார்.

நேற்று மலேசிய தினத்தையொட்டி நடைபெற்ற நிகழ்வில் உரையாற்றியபோதே அவர் இவ்வாறு குறிப்பிட்டார்.

இணைய வசதி, 5ஜி தொழில்நுட்பம் குறித்த சில அறிவிப்புகளை வெளியிட்ட பிரதமர், கிழக்கு மலேசியாவுக்கான சில ஒதுக்கீடுகள் பற்றியும் குறிப்பிட்டார்.

“இரு மாநிலங்களுக்குமான அகண்டவரிசை (Broadband service) சேவை மேம்படுத்தப்படும். யாரும் பின்தங்கவில்லை என்பதை அரசாங்கம் உறுதி செய்யும். மின்னிலக்க உலகில் அனைவரும் இணைந்திருப்பார்கள்.

"இந்த முன்னெடுப்பு நடவடிக்கைகள் முழுமையடையும்போது, மலேசியர் தரமான இணைய இணைப்பை பெறுவதன் பொருட்டு மரங்களின் மீது ஏறத்தேவையில்லை. அதுபோன்ற நிகழ்வுகள் குறித்து நாம் கேட்க வேண்டியிருக்காது," என்று பிரதமர் இஸ்மாயில் சப்ரி உறுதி அளித்தார்.

சபாவை சேர்ந்த Veveonah Mosibin என்ற மாணவி, மோசமான இணைய இணைப்பின் காரணமாக தமது தேர்வுகளை இணையம் வழி எழுத சிரமப்படுவதாகக் கூறி இருந்தார்.

மேலும், வீட்டின் அருகே உள்ள மரத்தின் மீது ஏறி அமர்ந்து இணைய வகுப்பில் பங்கேற்றதாகவும் குறிப்பிட்டு, கடந்த ஆண்டு காணொளிப் பதிவு ஒன்றை வெளியிட்டிருந்தார் என்பது குறிப்பிடத்தக்கது.

இதை மறைமுகமாகச் சுட்டிக்காட்டி பிரதமர் மேற்கண்டவாறு கூறியதாகத் தெரிகிறது.