உயிருக்கு பயந்து பாஜகவுக்கு கட்சி மாறி வாக்களிப்பு: அகிலேஷ் யாதவ்

லக்னோ:

உத்தர பிரதேச மாநிலத்தில் செவ்வாய்க்கிழமை நடைபெற்ற மாநிலங்களவைத் தேர்தலில் சமாஜவாதி எம்எல்ஏக்கள் 7 பேர் உயிருக்கு பயந்து  கட்சி மாறி பாஜகவுக்கு வாக்களித்ததாக சமாஜவாதி கட்சித் தலைவர் அகிலேஷ் யாதவ் தெரிவித்தார்.

உத்தர பிரதேசத்தில் 10 மாநிலங்களவை எம்.பி. இடங்களுக்கு செவ்வாய்க்கிழமை தேர்தல் நடைபெற்றது.

இதில் பாஜக 8 இடங்களையும் சமாஜவாதி 2 இடங்களையும் கைப்பற்றின. இத்தேர்தலில் சமாஜவாதி எம்எல்ஏக்கள் 7 பேர் கட்சி மாறி பாஜக வேட்பாளருக்கு வாக்களித்தனர்.

இதுகுறித்து செய்தியாளர்களிடம் பேசிய அகிலேஷ் யாதவ், 7 எம்எல்ஏக்களுக்கும் பாஜக அரசிடமிருந்து எந்த அளவு நெருக்கடி தரப்பட்டிருக்கும் என நினைத்துப் பாருங்கள்.

இந்த எம்எல்ஏக்களில் சிலர் தங்களின் உயிரை காப்பாற்றிக் கொள்ளவும், சிலர் அழுத்தத்துக்குப் பணிந்தும், சிலர் தங்களுக்கு "மரியாதை' கிடைக்கும் என்றும் கட்சி மாறி வாக்களித்துள்ளனர் என்றார் அவர்.

- ஆர்யன்