மலாக்காவில் ‘கொடிப் போர்’ துவங்கியது: தேர்தல் செலவுகளைக் குறைக்க அரசியல் கட்சிகளின் சிக்கன முயற்சி

மலாக்கா:

16-ஆவது மலாக்கா மாநிலத் தேர்தல் விறுவிறுப்பு அதிகரிக்கத் தொடங்கியுள்ளது. நேற்று வேட்புமனுத் தாக்கல் நிறைவடைந்ததைத் தொடர்ந்து, அரசியல் கட்சிகளுக்கு இடையே ‘கொடிப் போர்’ (flag war) தொடங்கியுள்ளது; சாலை ஓரங்களிலும் மக்கள் அதிகம் கூடும் இடங்களிலும் பல்வேறு கட்சிகளின் கொடிகள் பறக்கவிடப்பட்டுள்ளன.

கோத்தா லக்ஸமானா (Kota Laksamana), பண்டா ஹிலிர் (Banda Hilir), செமாபோக் (Semabok), துயோங் (Duyong), புக்கிட் கட்டில் (Bukit Katil), ஆயர் மோலெக் (Ayer Molek) போன்ற நகர்ப்புறப் பகுதிகளில் அரசியல் கட்சிகளின் கொடிகள் பரவலாகப் பறக்கின்றன. 

இதில் பக்கத்தான் ஹராப்பான் (PH), தேசிய முன்னணி (BN), பெரிக்கத்தான் நேஷனல் (PN), பார்ட்டி பெர்சாமா மலேசியா (Bersama), பார்ட்டி பிரிபூமி பெர்சத்து மலேசியா (Bersatu) ஆகிய கட்சிகளின் கொடிகள் இடம்பெற்றுள்ளன.

மலாக்கா தேர்தலுக்காக, ஜோகூர், நெகிரி செம்பிலான் மாநிலத் தேர்தல்களில் பயன்படுத்தப்பட்ட கொடிகளையே பல அரசியல் கட்சிகள் மீண்டும் பயன்படுத்தி சிக்கனத்தைக் கடைப்பிடிக்கின்றன.

மலாக்கா டிஏபி (DAP) தலைவர் கூ போய் தியோங் (Khoo Poay Tiong) கூறுகையில், பெரும்பாலான கொடிகள் இன்னும் நல்ல நிலையில் இருப்பதால், அவற்றை மீண்டும் பயன்படுத்துவது தேர்தல் செலவுகளைக் குறைப்பதற்கான ஒரு சிக்கன நடவடிக்கையாக அமைகிறது என்று தெரிவித்தார்.

“எங்களிடம் அதிக நிதி வசதிகள் இல்லை. இருப்பினும், ஒரு குறிப்பிட்ட பகுதியில் பக்கத்தான் ஹராப்பான் (PH) போட்டியிடுகிறது என்பதை வாக்காளர்களுக்குத் தெரிவிக்க, கொடிகள், சுவரொட்டிகள், பதாகைகள் போன்ற பிரச்சாரப் பொருட்களை வைப்பது அவசியமாகும்.”

“இந்த பிரச்சாரப் பொருட்கள், PH சார்பில் போட்டியிடும் வேட்பாளர்களை வாக்காளர்களுக்கு அறிமுகப்படுத்தவும் உதவுகின்றன. எனவே, யார் அதிக கொடிகளை வைக்கிறார்கள் என்று போட்டியிடுவதை விட, இந்தச் செய்தியை வாக்காளர்களுக்குக் கொண்டு சேர்ப்பதே எங்களின் முதன்மையான நோக்கமாகும்” என்று அவர் கூறினார்.

- ஃபிதா