ரஷ்யாவில் கைது செய்யப்பட்ட ஜப்பானிய செய்தியாளர்: ஜப்பானின் அதிகாரிகள் சந்திப்பு 

டோக்கியோ: 

ரஷ்யாவில் உளவு பார்த்ததாகக் கூறி கைது செய்யப்பட்டுள்ள ஜப்பானியச் செய்தியாளரை, ஜப்பானியத் தூதரக அதிகாரிகள் முதன்முறையாக நேரில் சென்று சந்தித்துப் பேசியுள்ளனர்.

செய்தியாளரை நேரில் சந்தித்த தூதரக அதிகாரிகள், அவரது உடல்நிலை குறித்துக் கேட்டறிந்ததாகவும், அவர் நல்ல ஆரோக்கியத்துடன் இருப்பதை உறுதி செய்துள்ளதாகவும் ஜப்பான் வெளியுறவு அமைச்சு தெரிவித்துள்ளது.

ரஷ்யாவின் கிழக்குக் கோடியில் உள்ள சக்காலின் தீவில் உளவு நடவடிக்கைகளில் ஈடுபட்டார் என்ற சந்தேகத்தின் பேரில், ‘யுகி இமாய்’ என்ற அந்த ஜப்பானியச் செய்தியாளரை ரஷ்யப் பாதுகாப்புப் படையினர் அண்மையில் கைது செய்தனர்.

இந்தக் கைது நடவடிக்கை குறித்துக் குரல் கொடுத்துள்ள ஜப்பான் வெளியுறவு அமைச்சு, கைது செய்யப்பட்டுள்ள தங்கள் நாட்டுச் செய்தியாளரை ரஷ்யா உடனடியாக விடுதலை செய்ய வேண்டும் எனக் கேட்டுக்கொண்டுள்ளது.

அத்துடன், அவருக்குச் சட்டப்படியான நியாயமான விசாரணையும் மனிதநேய அடிப்படையிலான அணுகுமுறையும் வழங்கப்பட வேண்டும் என்றும் வலியுறுத்தியுள்ளது.

அதேவேளையில், ஜப்பான் அரசு செய்தித்துறையைச் சேர்ந்தவர்களை உளவு வேலைகளுக்காகப் பயன்படுத்தி வருவதாக மாஸ்கோ குற்றஞ்சாட்டியுள்ளது.

ஆனால், ரஷ்யாவின் இந்தச் சாட்டை ஜப்பான் பிரதமர் சனே தக்காஇச்சி முற்றிலும் மறுத்துள்ளார்.

-மவித்திரன்