ஜொகூரில் பள்ளிகள் நாளை முதல் கட்டம் கட்டமாகத் திறக்கப்படும்

ஜொகூர்பாரு:

ஜொகூர் மாநிலத்தில் பள்ளிகள் நாளை முதல் கட்டம் கட்டமாகத் திறக்கப்படும்.

ஜொகூர் மாநில கல்வி, தகவல் செயற்குழு உறுப்பினர் நகிப் முகமது கசாலி இதனை தெரிவித்தார்.

ஜொகூர் மக்களின் பாதுகாப்பு, சுகாதாரம், நல்வாழ்வை எப்போதும் வலியுறுத்தும் ஜொகூர் இடைக்கால சுல்தான் துங்கு மக்கோத்தா இஸ்மாயிலின் வழிகாட்டுதலின்படி இந்த முடிவு எடுக்கப்பட்டது.

எஸ்பிஎம், கல்வி அமர்வு இறுதித் தேர்வுகளுக்குத் தயாராவதற்குப் பள்ளி நிர்வாகத்திற்கும் ஆசிரியர்களுக்கும் இந்தக் காலகட்டம் அவகாசம் அளிக்கும் என்றும் அவர் கூறினார்.

தற்போதைய காற்றின் தரத்தில் ஏற்படும் மாற்றங்களுக்கு உட்பட்டு, ஜொகூர் முழுவதும் உள்ள அனைத்துப் பள்ளிகளும் வழக்கம் போல் முழுமையாகச் செயல்படும் வகையில், இரண்டாம் கட்டம் புதன்கிழமை தொடங்கும்.

இது தொடர்பாக, தற்போதைய காற்று மாசுபடுத்தும் குறியீட்டு அளவுகளின் அடிப்படையில், முகக்கவசம் அணிவது உள்ளிட்ட சுகாதாரம், பாதுகாப்புக்கான நிலையான செயல்பாட்டு நடைமுறைகளைச் செயல்படுத்துவதையும், பள்ளி நடவடிக்கைகளைக் கண்காணிப்பதையும் ஜொகூர் மாநிலக் கல்வித் துறை ஒருங்கிணைக்கும் என்று நகிப் கூறினார்.

- பார்த்திபன் நாகராஜன்