மாணவர்களைப் பாலியல் ரீதியாகத் துன்புறுத்திய தலைமையாசிரியர் மீது குற்றச்சாட்டு; உடனடியாக விசாரிக்க பேரா மாநிலக் கல்வி இலாகாவிற்கு ஃபட்லினா உத்தரவு

புத்ராஜெயா:

ஒரு தலைமையாசிரியர் மாணவர்களைப் பாலியல் ரீதியாகத் துன்புறுத்தியதாகக் கூறப்படும் குற்றச்சாட்டுகள் குறித்து விசாரணை நடத்துமாறு பேரா மாநிலக் கல்வித் துறைக்கு கல்வியமைச்சர் டத்தோஸ்ரீ ஃபட்லினா சிடேக் உத்தரவிட்டுள்ளார்.

விசாரணை முடியும் வரை, சம்பந்தப்பட்ட முதல்வர் தற்காலிகமாக பாகான் டத்தோ மாவட்டக் கல்வி அலுவலகத்தில் நியமிக்கப்பட்டுள்ளதாக அவர் தெரிவித்தார்.

இந்தச் சம்பவம் குறித்த 'த்ரெட்ஸ்' தளத்தில் வைரலான பதிவில், தனது கணக்கில் ஒரு கருத்துரையின் மூலம் அவர் இந்த அறிவிப்பை வெளியிட்டார்.

முன்னதாக, பேரா மாநிலம் தெலுக் இந்தான் நகரில் உள்ள ஒரு அரசு இடைநிலைப் பள்ளியின் முதல்வர் சம்பந்தப்பட்ட குற்றச்சாட்டுகளைத் தொடர்ந்து, பெற்றோர்களையும் சமூகத்தினரையும் எச்சரிக்கையாக இருக்குமாறு ஒரு வைரல் பதிவு கேட்டுக்கொண்டது.

அதில், ஒரு பெண் மூன்றாம் படிவ மாணவிக்கு அனுப்பப்பட்ட பாலியல் துன்புறுத்தல், காதல் செய்திகள், அத்துடன் ஒரு முறையற்ற உறவு குறித்த குற்றச்சாட்டுகளும் அடங்கியிருந்தன.

மேலும், மாணவர்களின் பாதுகாப்பிற்காக, சம்பந்தப்பட்ட அனைத்து தரப்பினரும் இந்த விஷயத்தை தீவிரமாக எடுத்துக்கொண்டு, இதுகுறித்த குற்றச்சாட்டுகளை புறக்கணிக்காமல் விசாரணை நடத்த வேண்டும் என்றும் அந்தப் பதிவு கூறப்பட்டுள்ளது.

- பார்த்திபன் நாகராஜன்