பயனர்களின் எண்ணிக்கை கணிசமாக அதிகரித்ததால் TuJu-வில் இடையூறு ஏற்பட்டது

புத்ராஜெயா:

பயனர்களின் எண்ணிக்கை கணிசமாக அதிகரித்ததைத் தொடர்ந்து, உள்ளூர் வழிசெலுத்தல் செயலியான TuJu-வில் தொழில்நுட்ப இடையூறுகள் ஏற்பட்டுள்ளதாக மலேசிய நெடுஞ்சாலை ஆணையம் தெரிவித்துள்ளது.

இதனால் ஏற்பட்ட சிரமத்திற்கு வருத்தம் தெரிவித்த மலேசிய நெடுஞ்சாலை ஆணையம், தாங்களும் செயலியை வழங்கும் நிறுவனமான Prosignal Consortium Sdn Bhd (PCSB)-யும், இந்த இடையூறுக்கான காரணத்தைக் கண்டறியவும், நிலைத்தன்மையை மீட்டெடுக்கவும், மேலும் பயனர்களின் அதிகரிப்பைச் சமாளிக்கும் வகையில் திறனை அதிகரிக்கவும் நடவடிக்கை எடுத்து வருவதாகக் கூறியுள்ளது.

வழிசெலுத்தல் செயல்பாடுகள், வழித்தடத் தகவல்களின் துல்லியம் மற்றும் பயனர் அனுபவம் தொடர்பான பயனர் கருத்துக்களுக்கும் மலேசிய நெடுஞ்சாலை ஆணையம் கவனம் செலுத்துகிறது.

TuJu மேலும் நிலையான, துல்லியமான மற்றும் பயனருக்கு உகந்த சேவைகளை வழங்குவதை உறுதிசெய்ய, மேம்பாடுகள் தொடர்ந்து செயல்படுத்தப்படும் என்று அவர் ஒரு அறிக்கையில் கூறினார்.

TuJu கடந்த 2025 நவம்பர் 26ஆம் தேதி அறிமுகப்படுத்தப்பட்டது. இது PCS, மலேசிய நெடுஞ்சாலை ஆணையமும் இணைந்து உருவாக்கிய ஒரு நெடுஞ்சாலை வழிசெலுத்தல் செயலியாகும்.

இஸ்ரேலால் அரசாங்கத் தகவல்களும் பயனர்களின் தனிப்பட்ட தரவுகளும் தவறாகப் பயன்படுத்தப்படுவதைத் தடுக்கும் பொருட்டு, நேற்று அரசு ஊழியர்கள் Waze வழிசெலுத்தல் செயலியைப் பயன்படுத்தத் தடை விதிக்கப்பட்டது.

பாதுகாப்பு அச்சுறுத்தல்களிலிருந்து முக்கியமான அரசாங்கத் தகவல்களையும் மக்களின் தனிப்பட்ட தரவுகளையும் பாதுகாப்பதற்காக பிரதமர் டத்தோஶ்ரீ அன்வார் இப்ராஹிம் இந்த முடிவை எடுத்தார்.

- பார்த்திபன் நாகராஜன்