லாவோஸில் போதைப்பொருள் பறிமுதல்; பிலிப்பைன்ஸ், பாங்சமோரோ நாட்டினருக்கு உள்ள தொடர்பு குறித்து போலிஸ் விசாரணை: ஹூசைன்

கோலாலம்பூர்:

லாவோஸில் 521 கிலோ மெத்தம்பெட்டமைன் பறிமுதல் செய்யப்பட்ட சம்பவத்தில் ஈடுபட்ட ஒரு கும்பலுடன் பிலிப்பைன்ஸ் அரசியல்வாதி ஒருவருக்குத் தொடர்பு இருக்கக்கூடும் என்ற சாத்தியக்கூறு குறித்து போலிஸ் விசாரித்து வருகிறது.

சுபாங்கில் உள்ள சுல்தான் அப்துல் அஜீஸ் ஷா விமான நிலையத்திலிருந்து தனியார் விமானம் புறப்படுவதற்கு முன்பு, மலேசியா வழியாக மேற்கொள்ளப்பட்டதாகக் கூறப்படும் பரிவர்த்தனைகள் மீது இந்த விசாரணை தற்போது கவனம் செலுத்தி வருகிறது.

போதைப்பொருட்களை ஆர்டர் செய்த இரண்டு பிலிப்பைன்ஸ் நாட்டினரைக் காவல்துறை கண்டுபிடித்துள்ளதாக புக்கிட் அமான் போதைப்பொருள் குற்றப் புலனாய்வுத் துறை இயக்குநர் டத்தோ ஹுசைன் ஒமார் கான் நேற்று தெரிவித்தார்.

அந்த இரண்டு நபர்களையும், கும்பலின் மற்ற உறுப்பினர்களையும் கண்டறிய, காவல்துறை பிலிப்பைன்ஸ் போதைப்பொருள் அமலாக்க முகமையுடன் இணைந்து செயல்பட்டு வருகிறது.

இந்த நடவடிக்கையுடன் பல அரசியல் பிரமுகர்களைத் தொடர்புபடுத்தும் பிலிப்பைன்ஸ் ஊடக அறிக்கைகளின் உறுதிப்படுத்தலுக்காக மலேசிய போலிஸ் காத்திருக்கிறது.

போதைப்பொருள் கடத்தும் முயற்சியுடன் தொடர்புடையதாக சந்தேகிக்கப்படும் 11 நபர்களை பிலிப்பைன்ஸ் அதிகாரிகள் அடையாளம் கண்டதைத் தொடர்ந்து இந்த முன்னேற்றம் ஏற்பட்டுள்ளது.

அவர்களில் பாங்சமோரோவின் முன்னாள் நாடாளுமன்ற உறுப்பினர், ஒரு போலிஸ் விமான அதிகாரி ஆகியோரும் அடங்குவர் என்று அவர் கூறினார்.

- பார்த்திபன் நாகராஜன்