அக்டோபர் 17 வரை ஜெட்டா, மதீனாவுக்கான விமான சேவைகளை மலேசியா ஏர்லைன்ஸ் ரத்து செய்தது

சிப்பாங்:

சவூதி அரேபியாவில் உள்ள ஜெட்டா, மதீனாவுடன் கோலாலம்பூர், ஜொகூர்பாருவை இணைக்கும் தனது அனைத்து விமான சேவைகளையும் அக்டோபர் 12 முதல் 17 வரையிலான காலத்திற்கு ரத்து செய்வதாக மலேசியா ஏர்லைன்ஸ் இன்று அறிவித்தது.

சவூதி அரேபியாவில் உள்ள விமான நிலையங்கள் மீது தொடர்ச்சியாக நடத்தப்பட்ட தாக்குதல்களுக்குப் பதிலளிக்கும் விதமாக இந்த முன்னெச்சரிக்கை நடவடிக்கை எடுக்கப்பட்டதாக விமான நிறுவனம் தனது அறிக்கையில் அறிவித்துள்ளது.

இதைத் தொடர்ந்து, பாதிக்கப்பட்ட பயணிகள் தங்களின் அசல் விமானத் தேதியிலிருந்து 30 நாட்களுக்குள், முழுப் பணத்தைத் திரும்பப் பெறுவதற்கோ அல்லது கூடுதல் கட்டணங்கள் ஏதுமின்றி தங்கள் விமானத் தேதியை மற்றொரு தேதிக்கு மாற்றுவதற்கோ தேர்வு செய்யுமாறு மலேசியா ஏர்லைன்ஸ் கேட்டுக்கொண்டது.

பாதிக்கப்பட்ட பயணிகள், மலேசியா ஏர்லைன்ஸ் இணையதளம் அல்லது மொபைல் செயலியில் உள்ள ‘My Booking’ பகுதி, நேரலை அரட்டை சேவை அல்லது 1 300 88 3000 (மலேசியாவிற்குள்) அல்லது +603 7843 3000 (சர்வதேச அளவில்) என்ற எண்ணில் உள்ள உலகளாவிய தொடர்பு மையம் வழியாக விமானத் தேதியை மாற்றுவதற்கோ அல்லது பணத்தைத் திரும்பப் பெறுவதற்கோ கோரிக்கையைச் சமர்ப்பிக்கலாம்.

சரியான நேரத்தில் அறிவிப்புகளைப் பெறுவதற்கு, பயணிகள் தங்களின் அனைத்து தொடர்பு விவரங்களையும் எனது முன்பதிவு' (My Booking) பகுதி மூலம் புதுப்பித்துக்கொள்ள வேண்டும் என்றும் நினைவூட்டப்படுகிறார்கள் என அந்நிறுவனம் தெரிவித்துள்ளது.

- பார்த்திபன் நாகராஜன்