காற்றின் திசை மாற்றம் புகைமூட்டத்தைக் குறைக்க உதவும் என எதிர்பார்க்கப்படுகிறது: ஜாஹித்

பெய்ஜிங்:

அடுத்த இரண்டு வாரங்களில் இந்தியப் பெருங்கடலை நோக்கி காற்றின் திசை மாறும் என எதிர்பார்க்கப்படுவதால், தீபகற்ப மலேசியா மற்றும் சரவாக்கில் எல்லை தாண்டிய புகைமூட்டத்தின் தாக்கத்தைக் குறைக்க இது உதவும் என எதிர்பார்க்கப்படுகிறது.

காற்றின் திசையில் எதிர்பார்க்கப்படும் இந்த மாற்றம் குறித்து மெட் மலேசியா தலைமை இயக்குநர் தெரிவித்ததாக துணைப் பிரதமர் டத்தோஶ்ரீ ஜாஹித் ஹமிடி கூறினார்.

தொடர்ந்து நடைபெற்று வரும் மனிதாபிமான முயற்சிகளைத் தவிர, காற்றின் திசையில் ஏற்படும் இந்த மாற்றம், மலேசியர்கள் நீண்டகால புகைமூட்டத்தால் தொடர்ந்து பாதிக்கப்படுவதிலிருந்து அவர்களைக் காப்பாற்றும் என்று அவர் ஒரு செய்தியாளர் சந்திப்பில் கூறினார்.

நேற்று தொடங்கிய பெய்ஜிங்,  தியான்ஜின் ஆகிய இடங்களை உள்ளடக்கிய ஐந்து நாள் பணிப் பயணத்திற்காக துணைப் பிரதமர்  தற்போது சீனாவில் உள்ளார்.

புகைமூட்டத்தை ஏற்படுத்திய காடு மற்றும் நிலத் தீயை அணைக்கும் நடவடிக்கைகளுக்கு உதவுவதற்கான மலேசியாவின் முன்மொழிவு குறித்து, இந்தோனேசியாவுக்கு அந்த உதவி தேவைப்படாது.

ஏனெனில் அந்த நாடு பேரிடரைச் சமாளிக்க அதிக எண்ணிக்கையிலான பணியாளர்களையும் வளங்களையும் பணியில் ஈடுபடுத்தியுள்ளது என்று அவர் கூறினார்.

மலேசியா சில உதவிகளை வழங்க முன்வந்துள்ளது. ஆனால் இந்தோனேசியாவே 19,000க்கும் மேற்பட்ட பணியாளர்களை அனுப்பியுள்ளது என்று அவர் கூறினார்.

- பார்த்திபன் நாகராஜன்