பிற மதங்களின் சடங்குகளைச் செய்வதும், சுத்தம் செய்வதும் முஸ்லிம்களுக்குத் தடை செய்யப்பட்டுள்ளது: பினாங்கு முஃப்தி

ஜார்ஜ்டவுன்:

பிற மதங்களின் சடங்குகளைச் செய்வதும், சுத்தம் செய்வதும் முஸ்லிம்களுக்குத் தடைசெய்யப்பட்டுள்ளது என்று பினாங்கு முஃப்தி அலுவலகம் இன்று சமூக ஊடகங்களில் ஒரு பதிவைப் பகிர்ந்துள்ளது.

பின்னர், பினாங்கு முஃப்தி முகமது சுக்கி உத்மானின் அறிக்கைக்கான இணைப்பை அது வெளியிட்டது.

அதில், இஸ்லாமியச் சட்டத்திற்கு எதிரான மதச் சடங்குகளிலிருந்து விலகி இருப்பதுடன், முஸ்லிம்கள் அல்லாதோரின் வழிபாட்டுத் தலங்களைச் சுத்தம் செய்வதில் ஈடுபடுவதையும் தவிர்க்க வேண்டும் என்று அவர் கூறியதாக மேற்கோள் காட்டப்பட்டுள்ளது.

இஸ்லாம் தனது பின்பற்றுபவர்களை நன்மை செய்வதையும், வெவ்வேறு மத சமூகங்களுடன் நல்லிணக்க உறவுகளை ஏற்படுத்துவதையும் ஒருபோதும் தடை செய்யவில்லை.

ஆனால் ஒவ்வொரு செயலும் இஸ்லாமியச் சட்டத்தின் வரம்புகளுக்கு உட்பட்டே இருக்க வேண்டும் என்று முகமது சுக்கி கூறியதாக அந்த ஊடக அறிக்கை மேற்கோள் காட்டியுள்ளது.

- பார்த்திபன் நாகராஜன்