டத்தோஸ்ரீ சரவணனின் 12 வயது மகனிடம் சொத்து விவரங்களை அறிவிப்பதற்கான அறிவிப்பை நாங்கள் தரவில்லை: MACC மறுப்பு 

புத்ரா ஜெயா:

முன்னாள் மனிதவள அமைச்சர் டத்தோஸ்ரீ எம். சரவணனின் 12 வயது மகனிடம் சொத்து விவரங்களை அறிவிப்பதற்கான அறிவிப்பை வழங்கியதாகக் கூறப்படுவதை மலேசிய ஊழல் தடுப்பு ஆணையம் (MACC) மறுத்துள்ளது.

இத்தகைய அறிவிப்புகளைப் பெறுபவர்களுக்கு என்று சட்டம் எந்தவொரு குறிப்பிட்ட வயது வரம்பையும் வரையறுக்கவில்லை என்றாலும், சரவணனின் மகன் விஷயத்தில் ஆணையம் தனது அதிகார வரம்பிற்குட்பட்ட விவேகமான முடிவை மேற்கொண்டதாக MACC-யின் தலைமை ஆணையர் அப்துல் ஹலீம் அமான் தெரிவித்தார்.

"சட்டத்தின்படி, ஒரு நபர் பெரியவரா அல்லது குழந்தையா என்பது போன்ற குறிப்பிட்ட வயது வரம்பு எதுவும் குறிப்பிடப்படவில்லை. உறவினர்கள் அல்லது நெருங்கிய தொடர்புடையவர்கள் என்பது மட்டுமே அதில் குறிப்பிடப்பட்டுள்ளது.

"எனவே, அந்த 12 வயது சிறுவனின் விஷயத்தில், நாங்கள் சூழ்நிலையைக் கருத்தில் கொண்டு விவேகமான முடிவை எடுத்தோம். அவரது 12 வயது மகனிடம் அறிவிப்பை வழங்க வேண்டாம் என்று நாங்கள் முடிவு செய்தோம்," என்று அவர் கூறியதாக 'ஹரியான் மெட்ரோ' (Harian Metro) செய்தி வெளியிட்டுள்ளது.

சரவணன், அவரது மனைவி , குழந்தைகள் ஆகியோருக்கு MACC ஏற்கனவே அறிவிப்புகளை வழங்கியிருந்ததாகவும், ஆனால் குடும்ப உறுப்பினர்கள் சிலர் வெளிநாட்டில் இருந்ததால் அவர்களால் நேரில் ஆஜராக முடியவில்லை என்றும் ஹலீம் கூறினார்.

அந்த 12 வயது சிறுவன் MACC தலைமையகத்தில் இருந்ததாலேயே, அவன் விசாரணை தொடர்பான அறிவிப்பைப் பெறுவதற்காக அங்கு வந்திருந்தான் என்று அர்த்தமல்ல என்றும் அவர் குறிப்பிட்டார்.

"அந்தச் சிறுவன் அறிவிப்பைப் பெறுவதற்காக அங்கு வரவில்லை. அவன் தனது பெற்றோருடன் வந்திருந்தான் அவ்வளவுதான்," என்று அவர் கூறினார்.

சரவணனின் 12 வயது மகனை அறிவிப்பைப் பெறுவதற்காகத் தலைமையகத்தில் ஆஜராகுமாறு MACC வலியுறுத்தியதன் மூலம் தனது அதிகாரத்தைத் தவறாகப் பயன்படுத்தியதாக முன்னாள் அமைச்சர் பி. வேத மூர்த்தி (P Waytha Moorthy) முன்பு குற்றம் சாட்டியிருந்தார்.

சொத்து விவரங்களை அறிவிக்குமாறு கோரும் அறிவிப்புகளைப் பெறுவதற்காக, சரவணனும் அவரது குடும்பத்தினரும் திங்களன்று புத்ராஜெயாவில் உள்ள MACC தலைமையகத்திற்குச் சென்றிருந்தனர்.

குழந்தையின் பெற்றோரான தன்னிடம் அந்த அறிவிப்பை வழங்கியிருக்க முடியும் என்று வாதிட்ட சரவணன், தனது 12 வயது மகனை MACC வரவழைத்த முடிவை கேள்விக்குள்ளாக்கியிருந்தார்.

வெளிநாட்டுத் தொழிலாளர் ஒதுக்கீடுகளுக்கு ஒப்புதல் அளிப்பதில் நடந்ததாகக் கூறப்படும் ஊழல் தொடர்பான விசாரணையின் ஒரு பகுதியாகவே இந்த அறிவிப்புகள் வழங்கப்பட்டன.

- பார்த்திபன் நாகராஜன்