குழந்தை பாலியல் வன்கொடுமை நடவடிக்கை 3. 0; ஆசிரியர், ஆய்வக உதவியாளர் உட்பட 53 பேர் கைது: டத்தோ குமார்

கோலாலம்பூர்:

போலிஸ், மலேசிய தகவல் தொடர்பு,  பல்லூடக ஆணையம் இணைந்து நாடு தழுவிய அளவில் நடத்திய குழந்தை பாலியல் வன்கொடுமை நடவடிக்கை 3.0இல், எட்டு குழந்தைகள் உட்பட மொத்தம் 53 பேர் கைது செய்யப்பட்டனர்.

புக்கிட் அமான் குற்றப் புலனாய்வுத் துறை இயக்குநர் டத்தோ எம். குமார் இதனை கூறினார்.

கைது செய்யப்பட்டவர்களில் 13 முதல் 56 வயதுக்குட்பட்ட 51 ஆண்களும் இரண்டு பெண்களும் அடங்குவார்கள்.

கடந்த செப்டம்பர் 14 முதல் 16 வரை மூன்று நாட்கள் நடைபெற்ற இந்த நடவடிக்கை, 14 படைப்பிரிவுகளையும் உள்ளடக்கி 92 இலக்குகளுக்கு எதிராக மேற்கொள்ளப்பட்டது.

மொத்தத்தில், 52 சோதனைகள் கைதுகளுக்கு வழிவகுத்தன, மற்ற 40 சோதனைகளில் கைதுகள் நடைபெறவில்லை.

பின்னர் மேற்கொள்ளப்பட்ட ஒரு தொடர் கைது நடவடிக்கையின் மூலம், மொத்த நபர்களின் எண்ணிக்கை 53 ஆக உயர்ந்துள்ளது என்று அவர் இன்று நடைபெற்ற செய்தியாளர் சந்திப்பில் கூறினார்.

எம்சிஎம்சியின் தலைமை வலையமைப்புப் பாதுகாப்பு அதிகாரி டத்தோ டாக்டர் முகமது சுலைமான் சுல்தான் சுஹைபுதீனும் உடனிருந்தார்.

கைது செய்யப்பட்டவர்களில் பஹாங்கைச் சேர்ந்த 24 வயது ஆசிரியர் ஒருவரும், திரெங்கானுவைச் சேர்ந்த 44 வயது ஆய்வக உதவியாளர் ஒருவரும் அடங்குவதாகவும், கைது செய்யப்பட்டவர்களில் மிக இளையவர் 13 வயது சிறுமி என்றும் அவர் கூறினார்.

மேலும், கைபேசிகள், கணினிகள் உள்ளிட்ட 90 டிஜிட்டல் சாதனங்கள் உட்பட, மொத்தம் 95 வழக்கு தொடர்பான பொருட்களும் பறிமுதல் செய்யப்பட்டன. மடிக்கணினிகள், டேப்லெட்டுகள், சேமிப்பு சாதனங்கள் மற்றும் ரவுட்டர்கள் அல்லது மோடம்கள், அத்துடன் ஐந்து பாலியல் விளையாட்டுப் பொருட்களும் பறிமுதல் செய்யப்பட்டன.

கைப்பற்றப்பட்ட சாதனங்களின் ஆரம்பகட்ட ஆய்வில், 653,193 டிஜிட்டல் கோப்புகள் கண்டறியப்பட்டன என்று அவர் கூறினார்.

- பார்த்திபன் நாகராஜன்