தஞ்சோங் செடிலியில் ஆற்றில் வீசப்பட்டதால் 5 வயது சிறுமி உயிரிழந்தார்

கோத்தா திங்கி:
தஞ்சோங் செடிலி, கம்போங் பாடாங் பகுதியில் ஐந்து வயது சிறுமியை ஆற்றில் வீசி கொன்றதாக சந்தேகிக்கப்படும் 37 வயது உள்ளூர்வாசி ஒருவரை இன்று போலிசார் கைது செய்துள்ளனர்.

கோத்தா திங்கி மாவட்ட போலிஸ் தலைவர்  யூசோஃப் ஓத்மான் இதனை கூறினார்.

காலை சுமார் 9.30 மணியளவில் இந்தச் சம்பவம் குறித்து தனது துறைக்கு தகவல் கிடைத்ததை அடுத்து சந்தேக நபர் கைது செய்யப்பட்டார்.

சந்தேக நபர், பாதிக்கப்பட்ட சிறுமியை ஆற்றில் வீசியெறிந்த பிறகு, அரிவாளுடன் வெறித்தனமாகச் செயல்பட்டு 40 வயதுடைய ஒருவரைத் துரத்தியதாக நம்பப்படுகிறது என்று அவர் கூறினார்.

தகவலின் பேரில், கோலா செடிலி போலிஸ் நிலையத்தைச் சேர்ந்த ஒரு போலிஸ் குழு சம்பவ இடத்திற்குச் சென்று சந்தேக நபரைக் கைது செய்தது.

கைது நடவடிக்கை மேற்கொள்ளப்பட்டபோது, ​​அங்கு ஏற்பட்ட தள்ளுமுள்ளுவில் ஒரு போலிஸ் அதிகாரி காயமடைந்தார்.

ஆனால் சந்தேக நபர் கைது செய்யப்பட்டார் என்று அவர் இன்று ஒரு அறிக்கையில் தெரிவித்தார்.

- பார்த்திபன் நாகராஜன்