அம்னோ அரண்மனையுடன் மோதிக்கொண்டிருந்தபோது உங்கள் குரல் எங்கே போயிருந்தது?: அக்மாலுக்கு வழக்கறிஞர் சிவமலர் கேள்வி

கோலாலம்பூர்:

கல்வியமைச்சின் முடிவு தொடர்பாக டத்தோ டாக்டர் முஹமட் அக்மால் சாலே வெளியிட்டுள்ள கருத்து, அவரது இரட்டை நிலைப்பாட்டையும், மலிவான அரசியல் விளம்பரத்திற்காக பிரச்சினையைத் திரித்து முன்வைக்கும் போக்கையும் மீண்டும் வெளிப்படுத்துகிறது.

கெஅடிலான் கட்சியின் துணைச் செயலாளர் வழக்கறிஞர் சிவமலர் கணபதி இதனை கூறினார்.

அமைச்சின் முடிவு எந்த வகையிலும் பூமிபுத்ராக்களின் சிறப்பு உரிமைகளை நீக்குவதில்லை.

மாறாக, குறிப்பிட்ட சில தனியார் நிறுவனங்கள் நடத்தும் நிறுவனங்களுக்கு, பூமிபுத்ரா பங்குதாரர்களின் 30 சதவீத பங்கு உரிமை தொடர்பான நிபந்தனை மட்டுமே இதில் சம்பந்தப்பட்டுள்ளது.

தெளிவான வரம்பைக் கொண்ட இந்த விவகாரத்தை இன உணர்வுகளைத் தூண்டும் வகையில் சித்தரித்து மக்களைக் குழப்ப வேண்டாம்.

நாம் பிரிந்து கொண்டிருப்பதில் அவர் மும்முரமாக உள்ளார். அவர்களுடைய வேலை தொடர்ந்து நடைபெறுகிறது.

நெகிரி செம்பிலானில் அம்னோ கட்சியினர் அரசியல் நாடகத்திற்குள் ஶ்ரீ மெனாந்தி அரண்மனையையும் அரச நிறுவனத்தையும் இழுத்துக் கொண்டிருந்தபோது, மடானி அரசாங்கம் மக்களின் பிரச்சினைகளுக்குத் தீர்வு காண்பதில் தொடர்ந்து கவனம் செலுத்தி வந்தது.

நெகிரி செம்பிலானில் தங்களுடைய கட்சியே உருவாக்கிய குழப்பத்திலிருந்து மக்களின் கவனத்தைத் திசை திருப்புவதற்காக கல்வியை புதிய அரசியல் ஆயுதமாக மாற்ற வேண்டாம்.

அக்மால் உண்மையிலேயே மலாய்க்காரர்களின் உரிமைகளுக்காகப் போராடுபவர் என்றால், நெகிரி செம்பிலானில் அம்னோ தலைமையினர் மாநில அரசியலமைப்புச் சட்டத்தையும் அரச நிறுவனத்தையும் மதிக்காதபோது அவரது குரல் ஒலித்திருக்க வேண்டும்.

ஆனால், அவர் தனது சொந்தக் கட்சிக்கு எதிரான விவகாரங்களில் மௌனம் காத்துவிட்டு அக்மால் அரசாங்கத்தைத் தாக்குவதில் மட்டும் உரத்த குரலில் பேசத் தேர்ந்தெடுத்துள்ளார் என்று அவர் கூறினார்.

- பார்த்திபன் நாகராஜன்