ஸ்கூடாய், தம்போய் வட்டாரத்தில் காணாமல் போன 4 பதின்ம வயதினரை போலிஸ் தேடி வருகிறது

ஸ்கூடாய்:

இரண்டு சிறுமிகள் உட்பட நான்கு பதின்ம வயதினர் ஜூலை, ஆகஸ்ட் மாதங்களுக்கு இடையில் காணாமல் போனதாகத் தெரிவிக்கப்பட்டுள்ளது.

அவர்கள் அனைவரும் கடைசியாக இங்குள்ள ஸ்கூடாய், தம்போய் பகுதிகளில் காணப்பட்டதாக நம்பப்படுகிறது.

ஜொகூர் பாரு வடக்கு மாவட்ட போலிஸ் தலைவர் ராடின் ராம்லான் ராடின் தாஹா, தனது குழுவினர் அந்த நான்கு பதின்ம வயதினரையும் தேடி வருவதாகக் கூறினார்.

17 வயது, 9 மாதங்கள் ஆன எமிலி லோ யி டெங் என்ற பதின்ம வயது சிறுமி கடந்த ஜூலை 10 முதல் காணாமல் போனதாகத் தெரிவிக்கப்பட்டுள்ளது.

அவர் கடைசியாக ஜூலை 9 அன்று காலை சுமார் 8 மணியளவில் இங்குள்ள தாமான் கிளாசியரில் உள்ள அவரது இல்லத்தில் காணப்பட்டதாகவும் அவர் கூறினார்.

16 வயது 10 மாதங்கள் ஆன மற்றொரு இளம் பெண், பாக்கியாம் லெட்சுமி பிலிப்ஸ் கடந்த ஆகஸ்ட் 6 ஆம் தேதி முதல் காணாமல் போனதாகப் புகாரளிக்கப்பட்டது.

அவர் கடைசியாக அதிகாலை 4 மணிக்கு ஸ்கூடாய், தாமான் ஹார்மோனியில் உள்ள தனது வீட்டில் காணப்பட்டார்.

அவர் கடைசியாக அணிந்திருந்த உடை, ஸ்ரீ ஸ்கூடாய் தேசிய இடைநிலைப் பள்ளியின் சீருடை ஆகும் என்று அவர் கூறினார்.

இதற்கிடையில், 16 வயதான அமல் ராஜ் எஸ் ஜான்சன் என்ற சிறுவன் கடந்த ஆகஸ்ட் 18 ஆம் தேதி முதல் காணாமல் போனதாகப் புகாரளிக்கப்பட்டது.

அவர் கடைசியாக இரவு சுமார் 11 மணியளவில் ஸ்கூடாய், தமன் நேசாவில் உள்ள தனது வீட்டில் காணப்பட்டார்.

மற்றொரு  சிறுவனான முஹம்மது நோர்ஹாஃபிஸ் முஹம்மது ரிசுவான், 17 கடந்த மே 31 முதல் காணாமல் போனதாகக் கூறப்படுகிறது.

கடைசியாக மாலை 6 மணியளவில் ஸ்கூடாயின் தாமான் பல்கலைக்கழகத்தில் உள்ள அவரது வீட்டில் காணப்பட்டார்.

சம்பந்தப்பட்ட எவரேனும் இருக்கும் இடம் குறித்து தகவல் தெரிந்த பொதுமக்கள், ஜொகூர் பாரு வடக்கு மாவட்ட காவல் தலைமையகத்தை 07-5561222 என்ற எண்ணில் அல்லது அருகிலுள்ள ஏதேனும் காவல் நிலையத்தைத் தொடர்பு கொள்ளுமாறு கேட்டுக் கொள்ளப்படுகிறார்கள்.

- பார்த்திபன் நாகராஜன்