அரசாங்கம் நிலையாக இருப்பதே முக்கியம் என்பதால் அம்னோ விவகாரத்தில் நான் மிதமான பாதையைத் தேர்ந்தெடுத்தேன்: பிரதமர்

கோழிக்கோடு:

ஒருமைப்பாட்டு அரசாங்கத்தில் அம்னோவுடனான ஒத்துழைப்பு விவகாரம் தொடர்பான கருத்து வேறுபாடுகளைக் கையாள்வதில் ஒரு மிதமான அணுகுமுறையைத் தேர்ந்தெடுத்தேன்.

பிரதமர் டத்தோ அன்வார் இப்ராஹிம் இதனை கூறினார்.

இந்த விவகாரத்தில் மிகவும் கடுமையான எந்தவொரு நடவடிக்கையும் நாட்டிற்கு இழப்புகளை ஏற்படுத்தக்கூடும் என்பதால், அரசாங்கம் நிலையாக இருக்க வேண்டும்.

நான் ஒப்பீட்டளவில் ஒரு எளிமையான பாதையைத் தேர்ந்தெடுத்தேன்,

ஏனென்றால் அரசாங்கம் நிலையானதாக இருக்க வேண்டும் என்பதே முக்கியம். இல்லையெனில், நமது நாட்டிற்குப் பெரும் இழப்புகள் ஏற்படும்.

எனவே, என்னைப் பொறுத்தவரை அதுதான் முக்கியம். மேலும், அம்னோ உட்பட நாம் கேட்கும் குரலும் அதுவே என்பதை நான் காண்கிறேன்.

இந்தியப் பணிப் பயணத்தை முடிப்பதற்கு முன்பு, இங்குள்ள கோழிக்கோட்டில் மலேசிய ஊடகங்களுடனான செய்தியாளர் சந்திப்பில் அவர் இவ்வாறு கூறினார்.

- பார்த்திபன் நாகராஜன்