மைக்கியின் தொழில் முனைவோர் மாநாடு 2026; அமைச்சர் ஸ்டீவன் சிம் தொடக்கி வைக்கிறார்: டத்தோஸ்ரீ கோபாலகிருஷ்ணன்

கோலாலம்பூர்:

மைக்கி தேசிய அளவிலான தொழில் முனைவோர் மாநாடு, முத்ரா பிரச்சார பயணம் 2026 ஆகிய நிகழ்வுகளை மிகப் பெரிய அளவில் ஏற்பாடு செய்துள்ளது.

மைக்கி தலைவர் டத்தோஸ்ரீ என். கோபாலகிருஷ்ணன் இதனைத் தெரிவித்தார்.

நாட்டில் உள்ள இந்திய வணிகர்களின் மேம்பாட்டிற்காக மைக்கி எனப்படும் மலேசிய இந்திய வர்த்தகத் தொழிலியல்  சங்கங்களின் சம்மேளனம் பல்வேறு நடவடிக்கைகளை மேற்கொண்டு வருகிறது.


அவ்வகையில் மைக்கி மாபெரும் அளவில் தொழில் முனைவோர் மாநாட்டை ஏற்பாடு செய்துள்ளது.

இம்மாநாடு  வரும் செப்டம்பர் 20ஆம் தேதி
காலை 9.00 மணிக்கு மேல் பிரிக்பீல்ட்ஸ் பேங்க் ராக்யாட் மாநாட்டு மண்டபத்தில் நடைபெறுகிறது.


தொழில் முனைவோர் மேம்பாடு, கூட்டுறவு அமைச்சர் (குஸ்கோப்) ஸ்டீவன் சிம் அதிகாரப்பூர்வமாக தொடக்கி வைக்கிறார்.

மைம்கி தொழில் முனைவோர் மாநாடு 2026 என்பது தொழில் முனைவோர், வர்த்தகச் சமூகத்தினர், முகமைகள் மற்றும் தொடர்புடைய நிறுவனங்களை ஒருங்கிணைத்து, தொழில்முனைவோர் சூழலமைப்பை வலுப்படுத்தவும், தொழில்முனைவோருக்கு அதிக வாய்ப்புகளைத் திறந்து விடவும் உருவாக்கப்பட்ட ஒரு தளமாகும் என்று அவர் சொன்னார்.

இந்த நிகழ்ச்சி, மலேசியா முழுவதும் பல மாநிலங்களில் நடத்தப்பட்டு வரும் முத்ரா பிரச்சார பயணம் 2026 நிகழ்ச்சியின் தொடர்ச்சியாகும.

இதன் மூலம் தொழில் முனைவோரை நேரடியாக அணுகி, தகவல், நிதியுதவி, வர்த்தக ஆதரவு, தொழில்முனைவோர் மேம்பாட்டுக்கான வாய்ப்புகளைப் பெறுவதற்கான அணுகலை அதிகரிப்பதே நோக்கமாகும்.

இந்த உச்சிநிலை மாநாட்டின் மூலம், பங்கேற்பாளர்கள் தொடர்புடைய முகமைகள் வழங்கும் பல்வேறு முயற்சிகள், வசதிகள் குறித்து அறிந்து கொள்வதுடன், வர்த்தகத் தொடர்புகளை உருவாக்கி புதிய ஒத்துழைப்பு வாய்ப்புகளை ஆராயவும் முடியும்.

அரசாங்கம், நிதி நிறுவனங்கள், வர்த்தகச் சமூகத்தினருக்கு இடையிலான வலுவான ஒத்துழைப்பு, அதிகமான திறன்மிக்க தொழில்முனைவோரை உருவாக்குவதற்கும், போட்டித்தன்மை மிக்கவர்களாகவும், சவால்களை எதிர்கொள்ளக் கூடியவர்களாகவும் இருந்து உயர்ந்த நிலைக்கு வளர்வதற்கும் முக்கியமானது என மைக்கி நம்புகிறது என்று அவர் சொன்னார்.

ஆக இம்மாநாட்டில் தொழில்முனைவோர்களும் வர்த்தகச் சமூகத்தினரும் கலந்து கொள்ள வேண்டும் என அவர் கேட்டுக் கொண்டார்.

இன்று நடைபெற்ற ஊடகவியலாளர் சந்திப்பில் மைக்கி துணை தலைவர் டத்தோ ஏ.டி. குமரராஜா, உதவித் தலைவர்கள் திருநாவுக்கரசு உட்பட பலரும் கலந்து சிறப்பித்தனர்.

- பார்த்திபன் நாகராஜன்