பிரதமரின் மன்னிப்பை வரவேற்கிறோம்; Kuil Haram என்ற சொல்லை நிரந்தரமாகப் பயன்படுத்துவதை நிறுத்த வேண்டும்: மலேசிய இந்து சங்கம் கோரிக்கை

கோலாலம்பூர்: 

இந்து கோவில்களைக் குறிப்பிடும்போது "kuil haram” என்ற சொல்லைப் பயன்படுத்தியதற்காக பிரதமர் டத்தோஸ்ரீ அன்வார் இப்ராஹிம் பகிரங்கமாக மன்னிப்பு கோரியதையும், தனது தவறை ஒப்புக்கொண்டதையும் மலேசிய இந்து சங்கம் வரவேற்கிறது.

மலேசிய இந்து சங்கத்தின் தேசியத் தலைவர், ஸ்ரீ காசி சங்கபூஷன் தங்க கணேசன் இதனை கூறினார்.

பிரதமரின் அடக்கம், பொறுப்புக்கூறல், தனது தவறை பகிரங்கமாக ஒப்புக்கொள்ளும் மனப்பான்மையை மலேசிய இந்து சங்கம் பாராட்டுகிறது.

ஒரு நாட்டின் தலைவர் தனது தவறை ஒப்புக்கொண்டு மனப்பூர்வமாக மன்னிப்பு கேட்கத் தயாராக இருப்பது, பொறுப்பான தலைத்துவத்தைப் பிரதிபலிக்கிறது. 

மேலும் இது பொதுமக்களின் நம்பிக்கை, பரஸ்பர மரியாதை மற்றும் தேசிய ஒற்றுமையை வலுப்படுத்த நேர்மறையாகப் பங்களிக்கிறது.

அரசியல் தலைவர்கள், அரசு அதிகாரிகள், அமலாக்க முகமைகள், ஊடக அமைப்புகள் அல்லது எந்தவொரு தனிநபரும் வழிபாட்டுத் தலங்களைக் குறிப்பிடும்போது இத்தகைய சொற்களை இனி ஒருபோதும் பயன்படுத்தக் கூடாது.

" Kuil Haram " என்ற சொல் ஆழமான எதிர்மறையான, பாகுபாடான அர்த்தங்களைக் கொண்டுள்ளது. 

இது இந்து கோவில்களைத் தேவையின்றி இழிவுபடுத்துகிறது, இந்து சமூகத்தின் சமய உணர்வுகளைப் புண்படுத்துகிறது, புனிதமான வழிபாட்டுத் தலங்களின் கண்ணியத்தைக் குறைக்கிறது. 
மலேசியாவில் உள்ள பல இந்து கோவில்கள் குறிப்பிடத்தக்க வரலாற்று, கலாச்சார, ஆன்மீக மதிப்பைக் கொண்டுள்ளன. 

நவீன நில நிர்வாகம், திட்டமிடல் அமைப்புகள் நிறுவப்படுவதற்கு முன்பிருந்தே பல கோவில்கள் உள்ளூர் மக்களுக்குச் சேவை செய்து வருகின்றன. 

நில உரிமை, பதிவு அல்லது திட்டமிடல் விவகாரங்கள் சம்பந்தப்பட்ட அதிகாரிகளுக்கும் பாதிக்கப்பட்ட சமூகங்களுக்கும் இடையே சட்டபூர்வமான, வெளிப்படையான, கலந்தாலோசனை முறைகள் மூலம் தீர்க்கப்பட வேண்டும் என்று மலேசிய இந்து சங்கம் நம்புகிறது. 

இத்தகைய நிர்வாகப் பிரச்சினைகள் தவறான புரிதலையோ, பிளவையோ அல்லது தேவையில்லாத மனக்கசப்பையோ உருவாக்கும் மொழியைப் பயன்படுத்தித் தொடர்புகொள்ளப்படக் கூடாது.

இது தொடர்பாக, நிலம் அல்லது ஆவணச் சிக்கல்களை எதிர்நோக்கும் வழிபாட்டுத் தலங்களைக் குறிப்பிடும்போது, மரியாதைக்குரிய, நடுநிலையான, நிர்வாக ரீதியாகத் துல்லியமான கலைச்சொற்களைப் உபயோகம் செய்யுமாறு அனைத்து அரசு முகமைகள், தேர்ந்தெடுக்கப்பட்ட பிரதிநிதிகள், அரசு ஊழியர்கள், ஊடக அமைப்புகள், பொதுமக்களை மலேசிய இந்து சங்கம் வலியுறுத்துகிறது. 

நில உரிமை பதிவுசெய்யப்படாத ஆலயம் " (Kuil Tanpa Pendaftaran Tanah - KTPT) போன்ற சொற்கள் மிகவும் பொருத்தமானவை; ஏனெனில் அவை எந்தவொரு மதத்தின் கண்ணியத்தையும் குறைக்காமல் நிர்வாகச் சூழ்நிலைகளைத் துல்லியமாகப் பிரதிபலிக்கின்றன.

சம்பந்தப்பட்ட அனைத்துத் தரப்பினருடனும் அரசாங்கத்துடனும் நெருக்கமாகப் பணியாற்றி, உரையாடல், பரஸ்பர புரிதல், கூட்டரசு அரசியலமைப்பு, அனைத்து மலேசியர்களின் மத உரிமைகளுக்கான மரியாதையின் மூலம் கோவில் நிலம், ஆவணப் பிரச்சினைகளுக்கு நடைமுறை மற்றும் நிலையான தீர்வுகளைக் காண மலேசிய இந்து சங்கம் தொடர்ந்து கடமைப்பட்டுள்ளது.

மரியாதைக்குரிய மொழி என்பது வெறும் அரசியல் நாகரிகம் சார்ந்த விஷயம் மட்டுமல்ல—அது சமய நல்லிணக்கத்தைப் பாதுகாப்பதற்கும், பரஸ்பர நம்பிக்கையை வளர்ப்பதற்கும், நமது நாட்டின் அடையாளமாக விளங்கும் ஒற்றுமையைப் பேணிப் பாதுகாப்பதற்குமான நமது பகிரப்பட்ட உறுதிப்பாட்டின் பிரதிபலிப்பாகும்.

ஒவ்வொரு மதத்திற்குமான மரியாதை என்பது நாம் தேர்ந்தெடுக்கும் சொற்களின் மரியாதையிலிருந்தே தொடங்குகிறது என்று தங்க கணேசன் கூறினார்.

- பார்த்திபன்நாகராஜன்