டெல்லி விமான நிலையத்தில் 3.2 கிலோ தங்கக்கட்டிகள்: துபாயிலிருந்து கடத்தி வந்தவர் சிக்கினார் 

புது தில்லி:

புது தில்லி விமான நிலையத்தில் பயணியிடமிருந்து ரூ. 4.00 கோடி மதிப்பிலான தங்கம் பறிமுதல் செய்யப்பட்டுள்ளது.

துபையிலிருந்து  தில்லியில் உள்ள இந்திரா காந்தி சர்வதேச விமான நிலையத்திற்கு வந்த இந்தியப் பயணியை சுங்கத்துறை அதிகாரிகள் சந்தேகத்தின் அடிப்படையில் தடுத்து நிறுத்தி சோதனை செய்தனர்.

சோதனையில் கதவைத் தானாக மூடுவதற்காகத் தரையில் பொருத்தப்படும் 'ஃப்ளோர் ஸ்பிரிங்' (floor spring) எனும் கருவிக்குள் தங்கக் கட்டிகள் மறைத்து வைக்கப்பட்டிருந்ததை கண்டுபிடித்தனர்.

தொடர்ந்து, சுமார் ரூ. 4.03 கோடி மதிப்புள்ள 3.2 கிலோ எடையிலான தங்க கட்டிகளை அதிகாரிகள் பறிமுதல் செய்தனர்.

தங்கக் கட்டிகளை மறைத்து வைத்து, சுங்கச் சோதனையிலிருந்து தப்பிப்பதற்காக இந்தக் கருவியை அவர் பயன்படுத்தியது தெரிய வந்தது. இதுகுறித்து வழக்குப்பதிவு செய்த அதிகாரிகள், தொடர்ந்து விசாரணை நடைபெற்று வருவதாகவும் தெரிவித்தனர்.

- ஆர்யன்