அமெரிக்கா உலகக் கோப்பையை வென்றால், நிலவுக்குக் கால்பந்து பறக்கும்: நாசாவின் வாக்குறுதி

வாஷிங்டன்: 

2026-ஆம் ஆண்டு உலகக் கோப்பை கால்பந்து தொடரில் அமெரிக்கா சாம்பியன் பட்டம் வென்றால், நிலவின் மேற்பரப்புக்கு ஒரு கால்பந்து பந்தை அனுப்பத் தயாராக இருப்பதாக அமெரிக்காவின் தேசிய வானூர்தி, விண்வெளி நிர்வாகம் (NASA) அறிவித்துள்ளது.

விளையாட்டையும் விண்வெளி ஆய்வையும் ஒருங்கிணைக்கும் இந்தச் சிறப்பான அறிவிப்பை, NASA நிர்வாகி ஜாரெட் ஐசக்மேன், ஆர்ட்டெமிஸ் (Artemis) திட்டத்தின் கீழ் நிலவில் மனிதர்கள் நிரந்தரமாகத் தங்கும் தளத்தை அமைக்கும் திட்டம் தொடர்பான நிகழ்வில் வெளியிட்டார்.

"சவால் மிகவும் எளிதானது. அமெரிக்கா உலகக் கோப்பையை வென்றால், நாங்கள் ஒரு கால்பந்து பந்தை நிலவுக்கு அனுப்புவோம். அது அமெரிக்க தேசிய அணிக்கு கூடுதல் உத்வேகத்தை அளிக்கும் என்று நம்புகிறோம்," என்று அவர் தெரிவித்தார்.

இந்தத் திட்டம் நனவானால், நிலவின் தென் துருவப் பகுதியில் நிரந்தர மனிதத் தளத்தை அமைப்பதை இலக்காகக் கொண்ட ஆர்ட்டெமிஸ் விண்வெளிப் பயணங்களில் ஒன்றின் அறிவியல் ஆய்வுப் பொருட்களுடன் அந்தக் கால்பந்து பந்தும் எடுத்துச் செல்லப்படும் என்று அவர் கூறினார்.

இதனிடையே, NASA-வின் நிலவு தளத் திட்ட மேலாளர் கார்லோஸ் கார்சியா-கலான், அமெரிக்க அணி உலகக் கோப்பையை வென்றால், அந்த கால்பந்து பந்தை எடுத்துச் செல்ல தேவையான இடம் நிச்சயமாக ஒதுக்கப்படும் என்று உறுதியளித்தார்.

"கால்பந்து பந்து மிகவும் இலகுவானது. எனவே, அதை விண்வெளிக்கு எடுத்துச் செல்வதில் எந்த சிரமமும் இல்லை. இனி அனைத்தும் அமெரிக்க தேசிய அணியின் செயல்திறனையே பொறுத்துள்ளது. அவர்களுக்கு எங்கள் வாழ்த்துகள்," என்றார் அவர்.

முன்னதாக, அமெரிக்கா, கனடா, மெக்சிகோ இணைந்து நடத்தும் 2026 உலகக் கோப்பை போட்டிக்கான விளம்பர நடவடிக்கையின் ஒரு பகுதியாக, போட்டியின் அதிகாரப்பூர்வ கால்பந்து பந்தை சர்வதேச விண்வெளி நிலையத்திற்கு (ISS) NASA அனுப்பியிருந்தது.

இந்தப் புதிய முயற்சி வெற்றியடைந்தால், 1971-ஆம் ஆண்டு அப்போலோ-14 பயணத்தின் போது விண்வெளி வீரர் ஆலன் ஷெப்பர்ட் நிலவின் மேற்பரப்பில் கோல்ஃப் பந்தை அடித்த வரலாற்றுச் சாதனையையும் மிஞ்சும் புதிய மைல்கல்லாக அது அமையும் என்று ஜாரெட் ஐசக்மேன் குறிப்பிட்டார்.

- சங்கீர்த்தனா