உலகக்கோப்பை ரசிகர்களை கவர்ந்த இலவச ‘BofA Fan Bands’ காப்பு வளையல்கள்

நியூயார்க்: 

2010 உலகக்கோப்பையில் ‘வுவுசேலா’, 2018 உலகக்கோப்பையில் ரஷ்யாவின் ‘கொகோஷ்னிக்’ பாரம்பரியத் தொப்பி ரசிகர்களின் அடையாளமாக விளங்கிய நிலையில், 2026 உலகக்கோப்பையின் புதிய சின்னமாக இலவச ‘BofA Fan Bands’ காப்பு வளையல்கள் உருவெடுத்துள்ளன.

தனது விருப்பத்திற்கேற்ப அலங்கரித்துக்கொள்ளும் வகையில் வடிவமைக்கப்பட்டுள்ள இந்தக் காப்பு வளையல்கள், உலகக்கோப்பை ரசிகர்களிடையே பெரும் வரவேற்பைப் பெற்றுள்ளன. இதுவரை 7 லட்சத்திற்கும் அதிகமான வளையல்கள் விநியோகிக்கப்பட்டுள்ளதாக தெரிவிக்கப்பட்டுள்ளது.

போட்டியின் முக்கிய ஆதரவாளரான பேங்க் ஆஃப் அமெரிக்கா இலவசமாக வழங்கும் இந்த வளையல்களைப் பெறுவதற்காக, ரசிகர்கள் அரங்கங்கள், ரசிகர் திருவிழா பகுதிகளில் ஒரு மணி நேரத்திற்கும் மேலாக நீண்ட வரிசையில் காத்திருக்கின்றனர்.

எல் சால்வடோரைச் சேர்ந்த கரினா குவேரா, அதிக விலைக்கு விற்கப்படும் வழக்கமான நினைவுப் பொருட்களை விட, இந்த வளையல்கள் தனித்துவமான அனுபவத்தை வழங்குவதால் நீண்ட நேரம் காத்திருக்கத் தயங்கவில்லை என்று தெரிவித்தார்.

"கடைசியாக இந்த வளையலைப் பெற இரண்டு மணி நேரம் காத்திருந்தோம். ஆனால் அது உண்மையிலேயே அருமையான, மறக்க முடியாத நினைவுப் பொருள்," என்றார் அவர்.

இந்த வளையல்களுக்காக, போட்டியை நடத்தும் நகரங்களின் அடையாளங்களைப் பிரதிபலிக்கும் சிறிய அலங்காரப் பொருட்களையும் ரசிகர்கள் தேர்வு செய்யலாம். நியூயார்க் நகரத்திற்காக பீட்சா துண்டு, சுதந்திரத் தேவி சிலை உள்ளிட்ட வடிவங்கள் இடம்பெற்றுள்ளன.

மேலும், கடைசி 16, காலிறுதி, அரையிறுதி, இறுதிப் போட்டிகளுக்கான சிறப்பு அலங்காரத் தொகுப்புகளும் இந்த வாரம் அறிமுகப்படுத்தப்பட்டுள்ளன.

குறிப்பாக, இந்த முயற்சியின் பிரதான ஆதரவாளராக பேங்க் ஆஃப் அமெரிக்கா இருந்தாலும், அதன் பெயர் காப்பு வளையல்களில் வெளிப்படையாக இடம்பெறாதது ரசிகர்களின் கவனத்தை ஈர்த்துள்ளது.

- சங்கீர்த்தனா