18 மணி நேர தீவிர பேச்சுவார்த்தை நிறைவு: அமெரிக்கா–ஈரான் சந்திப்பில் புதிய திருப்பம்

ஒப்புர்கென்: 

மத்திய கிழக்கில் நீடித்து வரும் பதற்றத்திற்கு நிரந்தரத் தீர்வு காணும் நோக்கில் நடைபெற்ற அமெரிக்கா–ஈரான் உயர்மட்ட பேச்சுவார்த்தை, சுமார் 18 மணி நேர தீவிர ஆலோசனைகளுக்குப் பிறகு திங்கட்கிழமை அதிகாலை நிறைவடைந்தது.

இந்தச் சந்திப்பின் முக்கிய விளைவாக, பெய்ரூட்டில் நிலவும் மோதல்களைக் கட்டுப்படுத்தும் நோக்கில் ‘முரண்பாடு தடுப்பு ஒருங்கிணைப்பு அமைப்பு’ (Deconfliction Unit) ஒன்றை உருவாக்க இரு நாடுகளும் இணக்கம் தெரிவித்துள்ளன.

பாகிஸ்தான், கத்தார் ஆகிய நாடுகள் வெளியிட்ட கூட்டறிக்கையின்படி, லெபனான் அரசாங்கத்தின் பங்களிப்புடன் செயல்படும் இந்த அமைப்பு, இஸ்ரேலின் இராணுவ நடவடிக்கைகளை நிறுத்தும் முயற்சிகளைக் கண்காணிக்கும் முக்கிய பொறுப்பை ஏற்கும்.

எனினும், ஹிஸ்புல்லாவை இலக்காகக் கொண்டு தொடரும் மோதல்களை முடிவுக்குக் கொண்டுவர இந்த முயற்சி போதுமானதா என்பது இன்னும் கேள்விக்குறியாகவே உள்ளது. இருப்பினும், அமைதி ஒப்பந்தத்தை எட்டுவதற்கான முன்னேற்றம் காணப்படுவதாக இடைத்தரகர் நாடுகள் நம்பிக்கை வெளியிட்டுள்ளன.
60 நாட்களாக முன்னெடுக்கப்பட்ட இந்த இராஜதந்திர முயற்சி, லெபனான் நெருக்கடியை மையமாகக் கொண்டிருந்தது. நீண்டகாலமாக தீர்க்கப்படாமல் உள்ள இந்தப் பிரச்சினைக்கு தீர்வு காண்பது சர்வதேச சமூகத்தின் முக்கிய எதிர்பார்ப்பாக உள்ளது.

இதற்கிடையில், பேச்சுவார்த்தையின் தொடக்கத்திலேயே பதற்றமான சூழல் நிலவியது. ஹிஸ்புல்லாவுக்கு ஈரான் தொடர்ந்து ஆதரவு வழங்கினால் மீண்டும் தாக்குதல் நடத்தப்படும் என அமெரிக்க ஜனாதிபதி டொனால்ட் டிரம்ப் எச்சரித்ததைத் தொடர்ந்து, ஈரான் கடும் அதிருப்தி தெரிவித்தது.

“அச்சுறுத்தல்கள் தொடரலாம்; ஆனால் எங்களின் பதிலும் அதைவிட உறுதியானதாக இருக்கும்,” என்று ஈரான் தரப்பின் தலைமை பேச்சுவார்த்தையாளர் முஹம்மத் பாகர் காலிபாஃப் தெரிவித்ததாக கூறப்படுகிறது.

அமெரிக்க தரப்பில் துணை ஜனாதிபதி ஜே.டி. வான்ஸ், சிறப்பு தூதர்கள் ஸ்டீவ் விட்கொஃப், ஜாரெட் குஷ்னர் ஆகியோர் பங்கேற்றனர். ஈரான் சார்பில் காலிபாஃப், வெளியுறவு அமைச்சர் அப்பாஸ் அராக்சி கலந்துகொண்டனர்.

பேச்சுவார்த்தைக்கு பிந்தைய தனது கருத்தில், அராக்சி, மோதலை நிறுத்துவதற்காக பாகிஸ்தான், கத்தார் மேற்கொண்ட முயற்சிகளைப் பாராட்டியதுடன், “புதிய ஒருங்கிணைப்பு அமைப்பு தனது பணியை வெற்றிகரமாக நிறைவேற்றுகிறதா என்பதே இந்தப் பேச்சுவார்த்தையின் முதல் உண்மையான சோதனை” எனக் குறிப்பிட்டார்.

உலகின் கவனம் தற்போது அமெரிக்கா–ஈரான் பேச்சுவார்த்தையின் அடுத்த கட்ட நகர்வுகளின் மீது திரும்பியுள்ளது. லெபனானில் அமைதி நிலைநாட்டப்படுமா, அல்லது மத்திய கிழக்கின் பதற்றம் மேலும் தீவிரமடையுமா என்பது வரும் நாட்களில் தெளிவாகும்.

- சங்கீர்த்தனா