தலைநகர் ரயில் நிலையங்களில் தொடர் அநாகரீகம்: மனநலப் பாதிப்பா அல்லது திட்டமிட்ட குற்றமா?

கோலாலம்பூர்: 

கடந்த மாதம், தலைநகரைச் சுற்றியுள்ள இலகுரக ரயில் போக்குவரத்து (எல்.ஆர்.டி), மாஸ் ரேபிட் டிரான்சிட் (எம்.ஆர்.டி) நிலையப் பகுதிகளில் ஐந்து பெண்களைப் பாலியல் தொல்லை செய்த குற்றத்திற்காக, ஒரு கட்டுமானத் தொழிலாளிக்கு இங்குள்ள உயர் நீதிமன்றம் இன்று 18 மாத சிறைத்தண்டனையும்,  பிரம்படியும் விதித்துள்ளது.

நீதிபதி டத்தோ அஸ்லாம் ஜைனுதீன், 41 வயதுடைய வங்காளதேசியர் எம்டி ரம்ஜான் அலி மீது, இங்குள்ள நான்கு மாஜிஸ்திரேட் நீதிமன்றங்கள் மே 6 ஆம் தேதி விதித்த ஆறு மாத சிறைத்தண்டனையோடு 14,500 ரிங்கிட் அபராதம் தீர்ப்பை மறுபரிசீலனை செய்த பின்னர், இந்தத் தண்டனையை விதித்தார்.

"அந்த ஐந்து வழக்குகளுக்கும், நீதிமன்றம் ஒரு ஒட்டுமொத்த தண்டனையை வழங்கும். மாஜிஸ்திரேட் நீதிமன்றம் விதித்த தண்டனை நீக்கப்பட்டு, அதற்குப் பதிலாக, ஏப்ரல் 27 ஆம் தேதி கைது செய்யப்பட்ட தேதியிலிருந்து 18 மாத சிறைத்தண்டனை விதிக்கப்படுகிறது. மேலும், அந்த வழக்குகளில் ஒன்றிற்கு, குற்றஞ்சாட்டப்பட்டவர் ஒருமுறை பிரம்பால் அடிக்கப்பட வேண்டும் என்றும் உத்தரவிடப்படுகிறது" என்று அஸ்லாம் கூறினார்.

மே 6 ஆம் தேதி, ஜெர்மன் பெண் ஒருவர் உட்பட 21 முதல் 28 வயதுக்குட்பட்ட நான்கு உள்ளூர் பெண்களின் கண்ணியத்தை அவமதிக்கும் விதமாக நடந்து கொண்டதாக எம்டி ரம்ஜான் குற்றத்தை ஒப்புக்கொண்டார்.

சான் சௌ லின் எல்.ஆர்.டி நிலையத்தின் பாதசாரிப் பாதை, மலுரி எம்.ஆர்.டி நிலையத்தின் ரயில், மேல்தளப் படிக்கட்டுப் பகுதி, தாமான் மிடா எம்.ஆர்.டி நிலையத்திலிருந்து தேசிய அருங்காட்சியகம் எம்.ஆர்.டி நிலையம் வரையிலான ரயிலுக்குள், ஏப்ரல் 10 முதல் 25 வரை, காலை 7 மணி முதல் இரவு 10.30 மணிக்குள் இந்தச் செயல்கள் செய்யப்பட்டதாகக் கூறப்படுகிறது.

காலை முதல் இரவு வரை மக்கள் நெரிசலால் நிரம்பியிருந்த ரயில் நிலையங்கள், பெண்களுக்கு பாதுகாப்பான இடமாக இல்லாமல் அச்சத்தின் மையமாக மாறியிருப்பது இந்தச் சம்பவம் மூலம் மீண்டும் வெளிச்சத்துக்கு வந்துள்ளது.

தண்டனைச் சட்டத்தின் பிரிவு 354-ன் கீழ் இந்தக் குற்றச்சாட்டுகள் தாக்கல் செய்யப்பட்டுள்ளன. குற்றம் நிரூபிக்கப்பட்டால், அதிகபட்சம் 10 ஆண்டுகள் சிறைத்தண்டனை, அல்லது அபராதம், அல்லது பிரம்படி, அல்லது இரண்டும் விதிக்கப்படலாம்.

இதற்கு முன்னர், துணை வழக்குத் தொடரும் அதிகாரி ஃபரிதா நூர்தினி பஹ்ரும், பொதுமக்களுக்கு ஒரு செய்தியை அனுப்பும் விதமான தடுப்புத் தண்டனையை நீதிமன்றம் வழங்க வேண்டும் என்று கோரியுள்ளார்.

"பொது இடங்களில் பாலியல் தொல்லை செய்வது ஒரு முறையற்ற செயலாகும். கட்டிப்பிடித்தல், தொடுதல், பாதிக்கப்பட்டவர்களைத் தடவுதல் போன்ற செயல்கள் சாதாரணமானவை அல்ல. ஏனெனில், ஒரு சாதாரண மனிதர் அவ்வாறு நடந்து கொள்ள மாட்டார்.

"எல்.ஆர்.டி, எம்.ஆர்.டி  நிலையங்கள், அந்தச் சேவையைப் பயன்படுத்தும் பொதுமக்கள் நிறைந்திருக்கும் போது, குற்றஞ்சாட்டப்பட்டவர் வேறுபட்ட இடங்கள், நேரங்களில் அந்தச் செயல்களைச் செய்துள்ளார்" என்று அவர் கூறினார்.

மேலும், அந்த நபர் தனது தண்டனையை முடித்த பின்னர், நாடு கடத்தும் உத்தரவை வழங்குமாறும் கோரினார்.

எம்டி ரோம்ஜானைப் பிரதிநிதித்துவப்படுத்திய வழக்கறிஞர் டத்தோ டாக்டர் முஹம்மத் ரட்ஸுவான் இப்ராஹிம், தனது வாடிக்கையாளரை அவரது சொந்த நாட்டிற்குத் திருப்பி அனுப்பும் உத்தரவை நீதிமன்றம் பிறப்பிக்க வேண்டும் என்று கோரினார்.

அந்த நாட்டில் உள்ள அவரது குடும்பத்தினர், அந்த அனைத்து விஷயங்களுக்கும் நிதியளிக்கத் தயாராக இருப்பதாகவும் அவர் தெரிவித்தார்.

"இன்று நீதிமன்றத்திற்கு வந்த குற்றஞ்சாட்டப்பட்டவரின் சகோதரர், தனது சகோதரர் மன ரீதியான இடையூறுகளை எதிர்கொள்வதாகவும், சிகிச்சைக்காக அவரைத் தனது சொந்த நாட்டிற்குத் திருப்பி அனுப்பும் செயல்பாட்டில் இருப்பதாகவும் உறுதிப்படுத்தினார்.

"மேலும், குற்றஞ்சாட்டப்பட்டவரால் அபராதத்தைச் செலுத்த முடியாது என்பதால், அதற்குப் பதிலாக ஒரே நேரத்தில் நடைமுறைக்கு வரும் சிறைத்தண்டனையை வழங்குமாறு கோருகிறேன். நீதிமன்றத்தின் தகவலுக்காக, அவரது பணி அனுமதி பிப்ரவரி 2027 வரை இன்னும் செல்லுபடியாகும்" என்றார் அவர்.

பெண்கள் பாதுகாப்பாக பயணம் செய்யும் சூழல் இல்லையெனில், நகர வாழ்க்கையின் நம்பிக்கை பாதிக்கப்படும். பாதுகாப்பு விழிப்புணர்வு, அவசர உதவி வசதிகள், உடனடி புகார் நடவடிக்கைகள் மேலும் வலுப்படுத்தப்பட வேண்டும்.

- சங்கீர்த்தனா